Ўзбекистон Республикаси инвестициялар, саноат ва савдо вазири Лазиз Қудратов Кувайтнинг "Burgan International" компанияси бошқаруви раиси Саъдун Ҳаммад Ал-Отайбий билан учрашди.

Пойтахтимизда бўлиб ўтган музокара давомида инвестиция ва саноат соҳаларидаги ҳамкорликнинг икки томон учун амалий аҳамиятга эга истиқболли йўналишлари муҳокама қилинди.

Мулоқотда фармацевтика соҳасидаги ҳамкорликни кенгайтиришга алоҳида эътибор қаратилди. Хусусан, брендланган генериклар ва болалар учун мўлжалланган дори воситалари ишлаб чиқаришни ривожлантириш, фармацевтика маҳсулотларини рўйхатдан ўтказишга ёндашувни мувофиқлаштириш, шунингдек минтақавий бозорларга экспортни қўллаб-қувватлашга қаратилган икки томонлама англашув меморандуми тайёрлаш ташаббуси кўриб чиқилди.

Учрашув якунида локализация, технология алмашинуви ҳамда қўшимча қиймат яратиш йўлидаги тизимли ва узоқ муддатли шерикликни янада чуқурлаштиришдан ўзаро манфаатдорлик қайд этилди.

Г.Сатторова, ЎзА