26 sentyabr kuni joriy yilda Mudofaa vazirligi oliy harbiy ta’lim muassasalariga o‘qishga qabul qilingan birinchi bosqich kursantlari uchun tantanali Vatanga qasamyod tadbirlari bo‘lib o‘tdi.
Bu haqda Mudofaa vazirligi Axborot va ommaviy kommunikatsiyalar departamenti xabar berdi.
Qurolli Kuchlar akademiyasida mazkur oliy harbiy ta’lim muassasasining Umumqo‘shin fakultetiga va O‘zbekiston Respublikasi Qurolli Kuchlari Harbiy tibbiyot akademiyasiga yangi qabul qilingan yosh kursantlar Vatanga qasamyod qabul qilishdi. Shulardan 4 nafari “To‘maris izdoshlari” bo‘lgan, O‘zbekiston Respublikasi Qurolli Kuchlari Harbiy tibbiyot akademiyasiga yangi qabul qilingan va Vatan himoyasiga hayotini bag‘ishlashga ahd qilgan qizlardir.
Shuningdek, Chirchiq oliy tank qo‘mondonlik-muhandislik bilim yurti, O‘zbekiston oliy harbiy aviatsiya bilim yurtida ham Vatanga qasamyod tantanalari yuqori saviyada o‘tkazildi.
Kursantlar davlatimizning muqaddas ramzi bo‘lgan bayroqni o‘pib, buyuk ajdodlarning pok ruhlari oldida, Vatani oldidagi burchini halol bajarishga bel bog‘lab, vijdoni, or-nomus va sha’nini o‘rtaga qo‘yib, O‘zbekiston Respublikasiga, xalqiga va Prezidentiga bir umr sodiq bo‘lishga, har qanday mashaqqatli sinov va qiyinchiliklarda ham el-yurtining yuksak ishonchini oqlashga yaqinlari va keng jamoatchilik guvohligida tantanali ravishda ont ichdilar.
Qurolli Kuchlar akademiyasida kursantlarni Vatanga qasamyodga keltirishga bag‘ishlangan marosimda O‘zbekiston Respublikasi mudofaa vazirining birinchi o‘rinbosari – Qurolli Kuchlar Bosh shtabi boshlig‘i general-mayor Shuhrat Xolmuhamedov qatnashib, barcha qasamyod qabul qilgan kursantlarni tabrikladi.
Chirchiq oliy tank qo‘mondonlik-muhandislik bilim yurtida o‘tkazilgan marosimda mudofaa vazirining qurol-aslaha va qurollantirish bo‘yicha o‘rinbosari polkovnik Alisher Norboyev ishtirok etdi.
Vatanga qasamyodga keltirish marosimi so‘ngida tadbir qatnashchilari uchun konsert dasturlari, harbiy xizmatchilarning ko‘rgazmali qo‘l jangi chiqishlari namoyish etildi.
Z.JONIBEKOV, O‘zA