Фавқулодда вазиятлар вазирлиги академиясида биринчи босқич курсантларининг “Ватанга қасамёд” қабул қилиш тантанали тадбири бўлиб ўтди.

Тадбирда академия бошлиғи, юридик фанлари доктори профессор полковник Музаффаржон Мамасиддиқов сўзга чиқиб, “Янги Ўзбекистон – 2030” стратегияси асосида фавқулодда вазиятларни олдини олиш, ёнғин хавфсизлигини таъминлаш, қутқарув тизимини замонавий технологиялар билан жиҳозлаш ва энг муҳими, ватанпарвар кадрларни тайёрлашга катта эътибор қаратилганини таъкидлади.  

Қутқарувчилик касби бу шунчаки хизмат эмас, балки жон фидо этишга тайёрликни талаб қиладиган шарафли ва муқаддас бурчи эканлигини, бу касб инсон ҳаётини асраш, халқ оғирини енгил қилиш, юртнинг осойишталиги учун қўйилган қадам эканлигини эътироф этди.  

Шунингдек, тадбирда сўзга чиққанлар истиқлолимизнинг 34 йиллиги каби халқимиз учун улуғ ва азиз байрам билан муборакбод этган ҳолда, бугунги улуғ сана барчамиз учун ифтихор манбаи бўлса, “Ватанга қасамёд” маросими унинг маънавий давоми бўлганлигини таъкидлади.  

Тадбир якунида таниқли санъаткорларнинг ватаннни мадҳ этувчи куй – қўшиқлари ва чиқишлари байрам шукуҳига янада завқ улашиб, барча иштирокчилар ва таклиф этилган меҳмонларда илиқ таассуротлар қолдирди.  

Гулноза Бобоева, ЎзА