Халқаро кураш ассоциацияси (IKA) бошқарув қўмитасининг XV жаҳон чемпионати масаласига бағишланган шошилинч йиғилишида Эрон Ислом Республикасида юзага келган сиёсий нотинч вазият инобатга олиниб, мусобақа иштирокчиларининг хавфсизлигини таъминлаш масаласи устувор йўналиш сифатида муҳокама қилинди.

Видеоконференц-алоқа шаклида ташкил этилган йиғилишда жаҳон чемпионатини белгиланган муддатдан кейинга қолдириш ёки бошқа мезбон давлатга кўчириш имкониятлари кўриб чиқилди.

Таъкидланганидек, жаҳон чемпионатида 35 дан ортиқ давлатдан 300 нафарга яқин спортчи ва расмийлар “IKA Registration System” орқали иштирок этиш учун рўйхатдан ўтган.

Юзага келган вазият, шунингдек, Эрон кураш федерацияси чемпионатни юқори савияда ташкил этиш борасидаги тайёргарлиги инобатга олиниб, йиғилишда ўн кунлик кузатув муддати тасдиқланди.

Агар мазкур муддатда сиёсий вазият барқарорлашмаса, кураш бўйича XV жаҳон чемпионати март–апрель ойларида бошқа давлатда ўтказилиши белгиланди.

Билдирилган фикр-мулоҳазалар ва таклифларга кўра, XV жаҳон чемпионатига мезбонлик қилиш истаги билан Ўзбекистон ва Миср кураш федерацияларидан таклифлар тушди.

Т.Рўзиев,

ЎзА