Фарғона вилоятида ўтган давр мобайнида 1 минг 182 нафар кишида COVID-19 инфекцияси қайд этилган бўлиб, 1 минг 152 нафари дарддан тўлиқ фориғ бўлди. Албатта, вирусга қарши курашишда шифокорларнинг меҳнати беқиёс.

Риштон туманининг олис чўл ҳудудида жойлашган 2-сонли вилоят юқумли касалликлар шифохонасида туну кун чироқ ўчмайди. Бу ерда коронавирусга чалинганлар белгиланган стандартлар асосида даволанмоқда.

–Ўтган йили май ойи бошида ишга туширилган, халқ тилида “Ковид марказ” деб ном олган шифохонамизда вирусга қарши барча муолажалар қилишга шарт-шароит бор,–дейди бош шифокор Маъруфхўжа Турсунхўжаев. –Врачларимиз ҳам мунтазам равишда халқаро ва илғор тажрибаларни ўрганишяпти, юртимиздаги илмий марказлар билан алоқалар ўрнатилган. Ўтган вақт мобайнида уларда касалликка қарши курашиш учун етарли билим ва малака ҳам шаклланди.

Шифохона дастлаб 250 ўринга мўлжалланиб ташкил этилган. 2020 йил куз ойларида касалликнинг иккинчи тўлқини келиши сабабли икки қаватли 100 ўринга мўлжалланган реанимация бўлими янгитдан қуриб битказилди. Вилоят ҳокимлиги, соғлиқни сақлаш бошқармаси, масъуллар кўмаги билан Францияда ишлаб чиқарилган замонавий кислород станцияси олиб келиб ўрнатилди. Муассаса учун ўта керакли бўлган кислород илгари баллонларда ташиб келтириларди. Ҳозирда шифохонада 30 ўринли ҳомиладор аёллар учун ва 220 ўринли умумий даволаш бўлими фаолият олиб бормоқда.

26 май ҳолатига шифохонада 54 нафар бемор даволанмоқда. Ҳозирда бир ойлик иш режимида 34 нафар врач, 71 нафар ҳамшира ва 33 нафар кичик тиббий ходимлар фаолият олиб боришмоқда. Бу ерда ишлаётган  барча ходимлар тўлиқ эмланди. Биокимёвий лабораторияда иш қизғин. Мутахассислар ҳар бир намунани синчковлик ва тартиб билан текшириб, электрон базага жойлаб боришмоқда.

–Энг сўнгги русумдаги анализатор аппарати ишимизни бирмунча енгиллаштиряпти, – дейди бош эпидемиолог Абдумалик Ортиқов. – Ускуна ёрдамида бирданига 40 та таҳлилни 45 дақиқа ичида 27 хил мезон бўйича батафсил текшириш мумкин. Бунда инсон омили қатнашмайди.

Бугун хотиржамликка берилишга эрта.Касалликка қарши курашишда асосий қурол – эмлашдир. Шу боис ҳам вирусга қарши вакцина олиб, ўзимизни эҳтиёт қилганимиз уни олдини олишдаги энг яхши йўлдир.

М. Сулаймонов, ЎзА