Рўйхатда АҚШ ҳарбий-денгиз кучлари биринчиликда кўрсатилган. Мақолада айтилишича, АҚШ ҳарбий кемалар сони анча кўп.

“Бирор давлатнинг ҳарбий-денгиз флоти АҚШ флотичалик катта эмас. Қўшма штатлар флоти кемалари Тинч, Атлантика ва Ҳинд океани ҳамда Ўрта ер денгизи ва Форс кўрфазида мунтазам равишда ҳаракат қилади“, – дейилади мақолада.

АҚШ флоти ўнта авиаташувчи кема, тўққизта десант кемасига, 22 та крейсер, 62 та эсминц, 17 та фрегат ва 72 та сувости кемасига эга.

Мақолада келтирилишича, иккинчи ўрин Хитой ҳарбий-денгиз кучларига берилди. Хитой флотининг жадал ривожланишига мамлакат иқтисодиётининг ўсиши сабаб бўлиб, 1989 йилдан ҳозирги кунгача иқтисодий юксалиш туфайли Хитой мудофаа бюджети 10 баробар ортган.

Ҳозирги кунда Хитойда битта авиаташувчи, учта десант транспорти, 25 та эсменц, 42 та фрегат, 8 та атом ва тахминан 50 та сувости кемаси мавжуд.

Рўйхатда Россия ҳарбий-денгиз флоти учинчи ўринда келтирилади. Мақола муаллифининг ёзишича, Россия анъанавий равишда қуруқликдаги қўшинлари билан қудратли давлат ҳисобланади, шунинг билан бирга, у собиқ иттифоқ флотининг меросхўридир.

Қолаверса, Россия бирин-кетин янги кемаларни яратмоқда, ўз флотини модернизациялаштиряпти. Россия флотида 79 та йирик кема, жумладан, битта авиаташувчи, бешта крейсер, 13 та эсминц ва 52 та сувости кемаси бор.

Тўртинчи ўринга Буюк Британиянинг Қироллик ҳарбий-денгиз флоти муносиб кўрилди. Сўнгги йилларда Британия Қуролли Кучларида қисқартириш кетмоқда. Бу ҳарбий-денгиз флотига ҳам тааллуқли, дейилади нашрда.

Буюк Британия ҳарбий-денгиз қўшинлари учта катта десант кемаси, 19 та фрегат ва эсминц, 7 та зарбдор атом сувости кемаси, баллистик ракеталари билан қуролланган 4 та сувости кемасига эга.

Кучли бешталикни Япония денгиз кучлари якунлаб берди. Кунчиқар мамлакатнинг ҳарбий-денгиз флоти таркибида 114 кема бор. Уларнинг асосини 46 та эсминц ташкил этади. Япония сувости флоти 16 та сувости кемасидан иборат бўлиб, дунёдаги энг кучли флотлардан бири, деб ёзилади нашр хабарида.