Кубага учадиган халқаро авиакомпаниялар парвозларни бекор қилмоқда. Сабаби, Гавана аэропортида самолётларни ёқилғи билан таъминлаш имконияти йўқ, деб хабар бермоқда Evronews.

АҚШ Кубага нисбатан нефть эмбаргосини кучайтирмоқда. Куба ёқилғини Венесуэладан импорт қилар эди. АҚШ ва Венесуэла муносабатлари Куба иқтисодиётига қаттиқ таъсир қилмоқда.

Кубаликлар эса мавжуд шароитга мослашиш йўлларини излаяпти. Ёқилғи танқислиги туфайли Кубада туризм соҳаси учун жуда муҳим бўлган узоқ масофали рейслар жадвали бузилган. Air Canada авиакомпанияси эса Кубага парвозларни бутунлай тўхтатди.

Кубаликлар бир марта, фақат 20 литр ёқилғини ва уни ҳам фақат долларга сотиб олишлари мумкин. Жамоат транспорти катта узилишлар билан ишламоқда, кўплаб автобуслар умуман ҳаракатдан тўхтаган.

Маҳаллий аҳоли фавқулодда вазиятга мослашишга ҳаракат қилмоқда. Масалан, велосипед ёки шунга ўхшаш ёқилғисиз транспорт воситаларидан фойдаланишга ўтмоқда.

Душанба куни Мексика президенти Клаудия Шейнбаум Кубага ёрдам юборишини ва нефть етказиб беришни тиклаш учун барча дипломатик имкониятларни ишга солишини маълум қилди.

Ёқилғи танқислиги мамлакатдаги банкларнинг иш вақти қисқаришига, айрим маданий тадбирлар бекор қилинишига, ҳатто Кубада бейсбол мавсумини қисқартиришга ҳам олиб келди.

Ҳукумат нефть импортисиз яшаш учун қаттиқ чора-тадбирлар эълон қилди. Улар ичида меҳмонхона инфратузилмасини қисқартириш ҳам бор. Шу боис, мамлакатдаги бир қатор меҳмонхоналар, асосан Варадеро ва шимолий ҳудудлардаги меҳмонхоналар шошилинч тарзда ёпилиб, сайёҳлар бошқа жойларга кўчирилган.

<iframe width="448" height="797" src="https://www.youtube.com/embed/cI2y0s90c-0" title="Kubada samolyotlar uchun yoqilg`i tanqisligi boshlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА