АҚШ томонидан жорий этилган денгиз блокадаси ҳамда ташқи сиёсий босимлар натижасида Куба жиддий энергетик инқирозга дуч келмоқда. Мамлакатда нефть ва мазут захиралари кескин камайиб, ҳозирги истеъмол даражасида улар атиги 2–3 ҳафтага етиши мумкин.

Экспертлар фикрича, мазкур вазият Вашингтоннинг Венесуэлага нисбатан қўллаган денгиз қамали ва Мексикага кўрсатаётган босими билан бевосита боғлиқ. Чунки Куба узоқ йиллар давомида айнан Венесуэла ва Мексикани нефть ҳамда мазутнинг асосий етказиб берувчилари сифатида кўриб келган.

“Financial times” нашри ёзишича, ўлкада ички нефть қазиб олиш ҳажми жуда чекланган бўлиб, импортнинг қисқариши ўрнини боса олмайди.

Айни вақтда мавжуд нефть ва мазут захиралари асосан электр энергияси ишлаб чиқаришга йўналтирилмоқда. Мутахассислар огоҳлантиришича, агар ташқи таъминот тикланмаса, мамлакатда электр таъминоти ва саноат фаолиятида жиддий узилишлар юзага келиши мумкин.   

Ф.Яхшибоева, ЎзА