Португалия терма жамоаси ҳужумчиси Криштиану Роналду Қатарда бўлиб ўтаётган 2022 йилги Жаҳон чемпионатининг 1/8 финалида Швейцария билан учрашувдан сўнг «Ан-Наср» жамоасига ўтишини рад этди.

«Мен «Ан-Наср»га ўтаманми? Йўқ, бу тўғри эмас», дея интервью берган Роналду Португалиянинг Record ахборот тармоғига.  

Бундан олдинроқ Испанияда нашр этиладиган таниқли “Marca” газетаси Роналдунинг «Ан-Наср» жамоасига ўтишини ва футболчининг ўзи бу ҳақда хабар берганлигини маълум қилганди.  

Роналдунинг Саудия Арабистони жамоаси билан шартнома муддати 2,5 йилга белгиланаётганлиги, маоши ҳар мавсумда 200 миллион евро, шу жумладан, реклама даромадлари, умумий ҳолатда араб клубидаги фаолияти давомида у тахминан 500 миллион евро даромадга эга бўлиши айтилганди ушбу нашр хабарида.  

Кеча Португалия-Швейцария учрашувида Криштиану Роналду 73-дақиқада захирадан майдонга тушди. Мазкур ўйин Роналду учун мундиаллардаги 21-ўйин сифатида ёдда қоладиган бўлди. Ушбу кўрсаткич бўйича у Диего Марадона билан тенглашди.  

Т. Рўзиев, ЎзА