Мамлакатимизда олимпия ва паралимпия спорт турларининг оммавийлигини таъминлаш, иқтидорли ёш спортчиларни тайёрлаш, халқаро майдонда янги ғалабаларга эришиш учун зарур шарт-шароитлар яратиш борасида тизимли ишлар қилинмоқда.

Давлатимиз раҳбари Шавкат Мирзиёев жорий йилнинг 18 август куни Тошкент шаҳрида қуриб битказилган "Олимпия шаҳарчаси"га ташрифи чоғида мазкур маскан келгусида мамлакат спорт соҳасининг илмий, амалий ва таълим марказига айланиши асносида Олимпия ўйинлари тизимидан жой олган натижадор спорт турларини кўпайтиришга хизмат қилишини таъкидланган эди.

Шу маънода, бугунги кунда дунёда оммавийлиги жиҳатдан футболдан кейин иккинчи ўринда турадиган крикет спорт турининг юртимиздаги тараққиётини таъминлашда Ўзбекистон крикет федерацияси томонидан изчил ишлар амалга ошириб келинмоқда.

Ўтган ҳафтанинг сўнгги кунларида Ўзбекистон крикет федерациясига келган Осиё крикет кенгаши вакиллари мамлакатимизда крикет спорт тури бўйича амалга оширилаётган ишлар, мавжуд спорт иншоотлари, пойтахтимизда жойлашган крикет академияси ва Қибрай туманидаги крикет стадионида шуғулланаётган ёшлар билан учрашувлар ўтказди.

[gallery-24931]

Куни кеча Осиё крикет кенгаши вакиллари - Сингапур крикет ассоциацияси президенти Маҳмуд Ғазнавий, Бирлашган Араб Амириликлари крикет кенгаши бош операцион директори Субҳан Аҳмад, мамлакатимиз крикет федерацияси президенти Азиз Михлиев, мураббий-мутахассислар иштирокида йиғилиш ўтказилди.

Муҳокамалар давомида халқаро ҳамкорлик алоқаларини янада ривожлантириш, ўзбекистонлик крикетчиларнинг нуфузли мусобақаларда, хусусан, Осиё ва ёзги Олимпия ўйинларида, қитъа ва жаҳон чемпионатларида, халқаро турнирларда иштироки, семинарлар, ўқув-машғулот йиғинларини ташкил этиш, крикет жиҳозлари каби бир қатор мавзулар таҳлил этилди.

Меҳмонлар мамлакатимизда фаолиятини бошлаган "Олимпия шаҳарчаси" инфратузилмаси крикет ривожига ҳам салмоқли таъсир кўрсатишини, ўзбекистонлик крикетчиларнинг техник-тактик маҳорати йилдан-йилга ўсиб бораётганини билдиришди.

Айниқса, Ўзбекистон крикет федерацияси тўлақонли иш олиб бораётгани, Ўзбекистон давлат жисмоний тарбия ва спорт университетида крикет факультети фаолият бошлагани юксак ғалабалар йўлида муносиб пойдевор қўйилаётганидан дарак беради.

Т.Рўзиев,  

А.Мамадаминов (сурат)

ЎзА