Ёзги олимпия ўйинлари дастуридан ўрин олган спорт турлари орасида оммавийлиги жиҳатдан футболдан кейин иккинчи ўринда турувчи крикет ер юзидаги 4 миллиарддан ортиқ аҳолининг севимли спорт тури ҳисобланади.

Ўзбекистон крикет федерацияси 2019 йилда ташкил этилган бўлиб, мамлакатимизда қисқа фурсатда 6 та 13 ёшгача, 14 та 19 ёшгача, 4 та катталардан иборат ҳамда 9 та хотин-қизлар жамоалари ташкил  этилган.

Бундан ташқари, юртимизда турли соҳаларда меҳнат қилаётган чет эллик крикет спорт турига қизиқувчилардан иборат 2 та жамоа ташкил этилган.

Мамлакатимизнинг Тошкент шаҳри, Қашқадарё, Фарғона, Самарқанд, Тошкент, Сурхондарё, Бухоро ва Хоразм сингари вилоятларида крикет жамоалари мавжуд бўлиб, ўтган давр мобайнида улар ўртасида мусобақалар ўтказилиб келинмоқда.

[gallery-26488]

Айни пайтда крикет бўйича эркаклар ва аёллардан иборат терма жамоалар шакллантирилиб, навбатдаги ёзги олимпия ўйинларига тайёргарлик ишлари олиб борилмоқда.

Пойтахтимиздаги Миллий матбуот марказида  крикет федерациясининг  йил якунларига бағишланган матбуот анжуманида ушбу спорт турининг ривожи, унинг оммавийлигини таъминлаш, зарур инфратузилмани яхшилаш хусусида сўз борди.

Анжуманда иштирок этган Ўзбекистон крикет федерацияси раиси Азиз Михлиев, Афғонистон крикет кенгаши бош котиби Насиб Хон ва бошқалар журналистларнинг саволларига жавоб берди. Осиё ва халқаро крикет кенгаши билан манфаатли ҳамкорлик ўрнатилганини таъкидлаб, крикет спорт тури ривожи йўлида ўтган давр мобайнида Англия, Ҳиндистон, Покистон сингари бир нечта давлатларнинг крикет кенгашлари билан меморандумлар имзоланганини қайд этди.

Савол-жавобларга бой кечган анжуман якунида Ўзбекистон крикет федерацияси ва Афғонистон крикет кенгаши ўртасида ҳамкорлик алоқаларини мустаҳкамлаш, қўшма ўқув-машғулот йиғинларини ўтказиш, мутахассислар ўртасида тажриба алмашиш борасида ҳамкорлик меморандуми имзоланди.

Т.Рўзиев, А.Мамадаминов (сурат), ЎзА