Россия президенти Владимир Путиннинг Новгород вилоятидаги Валдай қароргоҳига дронлар орқали эҳтимолий ҳужум уюштирилди, деган хабарлар тарқалди.

Шундан сўнг Москва музокаралардаги позициясини қайта кўриб чиқишини билдирди. Россия расмийларига кўра, бу масала АҚШ билан олиб борилаётган музокараларга ҳам таъсир кўрсатиши мумкин. Бу ҳақда Евроньюс хабар тарқатди.  

Россия президенти ёрдамчиси Юрий Ушаковнинг айтишича, Владимир Путин АҚШ президенти Дональд Трамп билан телефон мулоқотида Россия олдинги келишувларни қайта баҳолаши мумкинлигини айтган. Шу билан бирга, Москва тинчликка эришиш бўйича АҚШ билан ҳамкорликни давом эттириш ниятида эканини таъкидлаган.  

Россия ташқи ишлар вазири Сергей Лавров эса ушбу эҳтимолий ҳужумда Украинани айблаб, “бундай ҳаракатлар жавобсиз қолмаслиги”ни билдирди. Унинг сўзларига кўра, Валдайдаги давлат қароргоҳига 90 дан ортиқ учувчисиз қурилмалар билан ҳужум уюштирилган.  

Украина президенти Владимир Зеленский эса бу айбловларни рад этиб, Кремль баёнотларини “навбатдаги ёлғон” деб атади. Унинг таъкидлашича, Россия АҚШ ва Украина ўртасидаги музокараларни издан чиқаришга уринаётган бўлиши мумкин.

Зеленский, шунингдек, Россия томонидан Украинадаги фуқаролик объектларига, жумладан Киевга янги ҳужумлар хавфи борлигидан огоҳлантирди. Айни пайтда АҚШ воситачилигида урушни тўхтатиш бўйича музокаралар давом этмоқда, аммо томонлар ўртасида кескинлик сақланиб қоляпти.

<iframe width="650" height="420" src="https://www.youtube.com/embed/KtEAWRE1joo" title="Kreml Ukrainaga tahdid qildi..." frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжанов, Анвархўжа Аҳмедов, ЎзА