РФ президенти ёрдамчиси Юрий Ушаковнинг айтишича, Кремль учун АҚШ томонидан таклиф қилинган дастлабки “тинчлик режаси” кўп жиҳатдан мақбул ҳисобланади. У Европа томони таклиф қилган Россия – Украина зиддиятини тугатиш бўйича ўзгартириш лойиҳасини мукаммал эмас, деб баҳолади.

Қизиқ жиҳати, Ушаков Женевада АҚШ ва Украина делегациялари муҳокама қилган “тинчлик режаси”нинг айнан қайси талқинини назарда тутганига аниқлик киритмаган. Режанинг ҳеч бир шакли расман эълон қилинмаган, фақат баъзи моддалари ҳақида айрим ОАВ эълон қилган, холос.

“Тинчлик режаси” атрофида жуда кўп миш-мишлар бор, Россия фақат АҚШдан тўғридан-тўғри олган маълумотларга ишонади, деб ёзиб чиқди “ТАСС” ахборот агентлиги.

Оқ уй матбуот котиби Кэролайн Ливиттнинг айтишича, янгиланган режа яна бир бор Россия томонига тақдим этилиши керак. Яъни, бундан кўринади-ки, Женевада муҳокама қилинган режа ҳали Кремлга тақдим этилмаган. Ливитт АҚШ ва Украина етакчилари шу ҳафта ичида учрашуви режалаштирилмаганини билдирди. 

Айрим нашрлар Европа томони режага киритган ўзгартиришлар Киев манфаатларига мос келади, ҳарқалай бир қатор муҳим бандларни сезиларли равишда юмшатади, деб ёзмоқда.  Кремль вакили эса гарчи расмий бўмаса-да, бу каби хабарларга ўз муносабатини билдирган.  

<iframe width="560" height="315" src="https://www.youtube.com/embed/qjKuczBaHZ4?si=LWdV0Er9PqqkppdW" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА