—Ular axborot kommunikatsiya texnologiyalaridan yetarlicha foydalana olishyaptimi?

—Foydalanish imkoniyatlarini rivojlantirish uchun qanday chora tadbirlarni yo‘lga qo‘yish kerak?  

Ko‘zi ojiz hamda zaif ko‘ruvchi yoshlar o‘rtasida “Yosh dasturchilar” ko‘rik-tanlovining respublika bosqichi bo‘lib o‘tdi.    

O‘zbekiston ko‘zi ojizlar jamiyati markaziy boshqaruvi hamda Yoshlar ishlari agentligi bilan hamkorlikda tashkil etilgan tanlovning hududiy bosqichida 250 nafar yoshlar ishtirok etib, ulardan Respublika bosqichiga 14 nafari saralab olindi.  

—Ushbu tadbirni o‘tkazishdan asosiy maqsad ko‘zi ojiz insonlar axborot-kommunikatsiya texnologiyalaridan qanchalik foydalanayotganini bilish, eng iqtidorli dasturchilarni yig‘ib, ular bilan fikrlashgan holda ushbu soha bo‘yicha qilinadigan ishlarni belgilab olishdan iborat, — deydi O‘zbekiston ko‘zi ojizlar jamiyati markaziy boshqaruvi raisi o‘rinbosari Qahramon Haqberdiyev. — Tanlov davomida IT sohasida muvaffaqiyatli faoliyat ko‘rsatayotgan, oliy o‘quv yurtlarida, aspirantura, doktoranturalarda o‘qib, ilmiy ish qilayotgan, ayniqsa, o‘zlari kabi insonlar uchun kerakli dasturlarni yaratayotgan ko‘zi ojiz dasturchilarni aniqlab oldik. Endigi vazifamiz ularning faoliyatlarini, yaratgan dasturlarini ommalashtirishdan iborat.  

Shuningdek, tadbirda IT sohasi kundan-kunga rivojlanib borishini hisobga olgan holda bu kabi tanlovlar yiliga 2-3 marta o‘tkazilishi zarurligi ta’kidlandi.    

—Axborot texnologiyalari ko‘zi ojiz insonlar uchun qanday vazifani bajarishini bilmaganlar hayotda ko‘p narsalarni yo‘qotadi, — deydi Alisher Navoiy nomidagi Toshkent davlat o‘zbek tili va adabiyoti universiteti 2-bosqich magistratura talabasi Mirali G‘iyosov. — Bilgan odam har doim eng avvalo o‘zi mustaqil harakatlanib, o‘zining rizqini o‘zi topa oladi. Birovga muhtoj bo‘lmaydi.    

<iframe width="640" height="420" src="https://www.youtube.com/embed/l6klMA47YTA" title="Ko‘zi ojiz insonlar hayotida axborot texnologiyalarining o‘rni qanday?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Tanlov yakuniga ko‘ra 3-o‘rin Doniyor Mustafoqulov, 2-o‘rin Shahzod Hasanov, 1-o‘rin Jaloliddin Sirojiddinovga nasib etdi. G‘oliblarga pul mukofotlari hamda esdalik sovg‘alari topshirildi.    

N.Rahmonova,

A.Sodiqov (video), O‘zA