Тошкентда 27 сентябрь куни Инсон ҳуқуқлари бўйича Ўзбекистон Республикаси Миллий маркази ва Германиянинг Фридрих Эберт номидаги жамғармаси ҳамкорлигида ташкил этилган давра суҳбатида депутатлар, давлат ҳокимияти, ҳуқуқни муҳофаза қилувчи органлар, фуқаролик жамияти институтлари вакиллари ана шу тажрибанинг ҳуқуқий асослари ва амалий жиҳатлари билан танишди.

Давра суҳбатида Германия Федератив Республикаси собиқ адлия вазири Херта Дойблер Гмелин хоним Германиянинг антикоррупциявий механизми кучли қонунчилик, очиқ фуқаролик жамияти, жамоатчилик назорати ва ОАВ эркинлигига асосланишига урғу берди. Мисол учун, Германияда қизил чироқдан ўтган ҳайдовчига 100 евро миқдорида жарима белгиланади. Энг асосийси, қоидабузар жаримани ҳодиса жойида зудлик билан ва фақат банк ҳисобрақами орқали тўлаши лозим. Агар ҳайдовчи жаримани нақд пул орқали тўласа ва йўл-патруль ходими уни олса, бу ҳолатда иккаласи ҳам жавобгарликка тортилади.

Ёки яна бир мисол, Германиянинг собиқ президенти Кристиан Вульф ноқонуний молиявий даромад олишда айбланиб, 2012 йилда ўз лавозимини тарк этган эди. Вульфга қарши сўнгги тергов иши унинг дўсти, кино продюсери Девид Грёневольдга тақалиб, ишбилармон собиқ президентнинг меҳмонхона харажатларини ўз ҳисобидан тўлаган эди. ОАВ, кенг жамоатчилик ушбу ҳодисани коррупцияга боғлаган.

Давра суҳбатида Ўзбекистоннинг антикоррупциявий механизми Германия тажрибаси билан қиёсий таҳлил қилинди.

Мамлакатимизда қисқа вақт ичида коррупцияга қарши курашишнинг ҳуқуқий механизмларини такомиллаштиришга оид бешта ҳуқуқий ҳужжат, жумладан, “Ҳуқуқий ахборотни тарқатиш ва ундан фойдаланишни таъминлаш тўғрисида”ги, “Маъмурий тартиб-таомиллар тўғрисида”ги, “Жамоатчилик назорати тўғрисида”ги, “Давлат харидлари тўғрисида”ги қонунлар қабул қилинди. Шунингдек, Коррупцияга қарши курашиш бўйича республика идоралараро комиссияси ташкил этилди. Коррупцияга қарши курашиш бўйича Давлат дастури тасдиқланган. Адлия вазирлиги томонидан коррупцияга оид ҳуқуқбузарлик ҳолатлари ҳақидаги хабарлар ўз вақтида етказилишини таъминлаш мақсадида телеграм ижтимоий тармоғида махсус бот ишга туширилган. Коррупцияга қарши курашишда фуқаролик жамияти институтлари ролини оширишга ҳам катта эътибор қаратилмоқда.

– Коррупцияга қарши онгни шакллантиришда қонунлар билан бирга фуқаролик жамияти институтларининг ҳам роли муҳим, – деди Инсон ҳуқуқлари бўйича Ўзбекистон Республикаси Миллий маркази директори Акмал Саидов. – “Коррупцияга қарши курашиш тўғрисида“ги қонунда ушбу иллатга қарши курашиш бўйича давлат сиёсатининг асосий принциплари ва йўналишлари, ваколатли органлар тизими ва механизмлар, давлат ҳокимияти органлари билан фуқаролик жамияти институтларининг ўзаро ҳамкорлиги белгилаб берилган.

Тадбирда мамлакатимизда антикоррупциявий механизмни янада такомиллаштириш масалалари муҳокама қилинди. Коррупцияга қарши курашишда парламент назорати, суд амалиёти каби мавзуларда маърузалар тингланди.