Бугун дунё мамлакатлари, инсоният жамияти олдида турган глобал муаммолардан бири коррупциядир. Бу мудҳиш жиноят жаҳон иқтисодиёти, тараққиётига, фуқаролар маънавий-ахлоқий ривожланишига катта тўсиқдир.

Статистик маълумотларга кўра, жаҳон иқтисодиёти ҳар йили коррупциядан 2,6 триллион доллар миқдорида зарар кўрмоқда. Унинг маънавий, тарбиявий, инсоний нормаларга келтираётган зарарини эса ҳисоблаб бўлмайди.

Мудҳиш жиноят ўз кўлами билан кенгайиб борар экан, келажак авлодларимиз ҳаётига ҳам таҳдид солади. Фуқаролар, айниқса, ёшлар онгида “Пора бермасанг, ишинг битмайди”, “Пулинг бўлса, чангалда шўрва” деган нотўғри ва инсонни тўғри йўлдан чалғитувчи тушунча шаклланади. Шунинг учун ҳам коррупциянинг олдини олиш, унга қарши курашиш умумхалқ ҳаракатига айланиб улгурди. Бу иллатга қарши курашишда нафақат давлат органлари, балки бутун жамият, ҳар бир фуқаро масъулдир.

Мамлакатимизда коррупцияга қарши кураш олиб боришда мутлақо янги тизим яратилди. Олий Мажлис палаталарида масъул қўмиталар, Коррупцияга қарши курашиш бўйича миллий кенгаш ва агентлик ташкил этилгани бу масала давлатимизда нақадар устувор аҳамият касб этаётганини кўрсатади.

Ўзбекистон Республикаси Президенти Шавкат Мирзиёев Коррупцияга қарши курашиш миллий кенгаши йиғилишида юртимизда коррупциядан холи ҳудуд яратиш бўйича қилинган ишларга баҳо бериб, коррупция ислоҳотлар йўлидаги энг катта тўсиқ ва ғов эканлигини таъкидлади.

Коррупцияни келтириб чиқарувчи омилларга қарши кескин курашилмоқда. Ерларни ҳоким қарори билан ажратишдан тўлиқ воз кечилиб, аукцион тизимига ўтказилиши натижасида бу тизим халқчил бўлди. “Шаффоф қурилиш” дастури жорий этилганидан кейин соҳада ижобий ўзгаришлар кўзга ташланмоқда.
“Жамиятимиз ягона куч бўлиб, ҳаракат қилсак, албатта, катта ижобий самарага эришамиз.

Шу боис, маҳалла фаоллари, нуронийлар, зиёлилар, ёзувчи ва шоирлар, санъат ва маданият ходимлари, тадбиркорлар, таниқли шахслар, раҳбарлар, депутат ва сенаторлар – умуман бутун жамоатчилик бирлашиб, коррупцияга “Жамият танасидаги саратон сифатида қараш керак” деди Президентимиз.
Жорий йил 19 сентябрда давлатимиз раҳбарининг “Коррупцияга қарши курашиш соҳасида фуқаролик жамияти институтларининг иштирокини янада кенгайтириш ва илмий тадқиқотларни қўллаб-қувватлаш чора-тадбирлари тўғрисида”ги қарори қабул қилинди.

Қарорга асосан, Ўзбекистон нодавлат нотижорат ташкилотлари миллий ассоциацияси, “Юксалиш” ҳаракати ва “Ижтимоий фикр” республика жамоатчилик фикрини ўрганиш марказининг улар муассислигида муассаса шаклидаги “Коррупцияга қарши курашиш муаммолари бўйича минтақавий тадқиқот маркази” нодавлат нотижорат ташкилоти ташкил этилади.

Аҳолининг, айниқса, ёшларнинг, фуқаролик жамияти институтларининг коррупцияга қарши курашишдаги фаоллигини ошириш, жамиятда ушбу иллатга қарши муросасиз муносабатни шакллантириш масалаларини тадқиқ этиш марказнинг асосий вазифаларидан бири этиб белгиланди.

Марказ давлат ва жамият ҳаётнинг барча соҳаларида ҳалоллик стандартларини жорий этишга кўмаклашади, давлат органлари ҳамда бошқа ташкилотларга илмий-услубий ёрдам кўрсатади. Шунингдек, халқаро ва минтақавий долзарб аҳамиятга эга бўлган коррупцияга қарши курашиш муаммоларини, шу жумладан, маиший коррупциянинг ҳолати, хусусияти, миқёслари, ўзгаришлари ҳамда уни келтириб чиқараётган асосий омиллар комплекс ўрганилади ва тадқиқ қилинади. Коррупцияга қарши курашиш муаммоларини тадқиқ этишда маҳаллий ва хорижий экспертлар ҳамкорлиги йўлга қўйилади.

Коррупция жамиятни турли йўллар билан исканжага оладиган энг хавфли ҳаракатдир. Бу қилмишга аралашган, қонунбузарликка қўл урган шахс учун қадрли нарсалар, мўътабар туйғулар қиймати йўқолади. Бундай кимсалар ҳаётда ҳамма нарсани сотиб олиш ва сотиш мумкин деб ўйлайди. Улар ҳеч кимга, имон-эътиқодга ишонмайди. Чунки бундай тоифадагилар ота-онаси, қариндош-уруғлари, дўстлари, маҳалла-кўйнинг юзини ерга қаратишдан, бошини эгишдан уялмайди.

Буюк бобокалонимиз Амир Темур ҳазратлари ҳалоллик, ростликни ички ва ташқи сиёсатини юритишда, оила тарбиясида, дину диёнатга риоя этишда бош қадрият деб билганлар. Соҳибқирон тузукларидаги “Рости русти” деган ёзув “Куч тўғриликдадир” деган маънони ифода этади.

Зеро, ростлик, тўғрилик – ҳар бир ишга мантиқли ёндаша олиш, ҳақиқатни ўз фаолиятининг мезони деб билиш, ҳамма нарсани ўз номи билан аташ лозим. Пайғамбаримиз Муҳаммад алайҳиссалом ҳалоллик, тўғрилик ҳақида сўзлаб, шундай деганлар: “Мен рост гапни яхши кўраман”.

Дарҳақиқат, ҳалоллик ва тўғрилик инсонни камолот сари, порахўрлик, ўғрилик, ўзганинг ҳақига кўз олайтириш эса муқаррар ҳалокатга элтувчи жарлик сари етаклайди.

Рисолат МАМАЖОНОВА,
Ўзбекистон “Миллий тикланиш” 
демократик партияси 
Фарғона вилоят кенгаши 
раисининг ўринбосари.
ЎзА