Шунингдек, ISO 37001 га мувофиқ коррупцияга қарши курашиш бўйича миллий менежмент тизимларини сертификатлаштириш кун тартибида.

9 декабрь – Халқаро коррупцияга қарши курашиш куни муносабати билан Тошкентда ўтказилган “Ўзбекистонда коррупцияга қарши ислоҳотлар: ютуқлар ва устувор жиҳатлар” мавзуидаги халқаро форумда шу фикрлар илгари сурилди. 

Форум Адлия вазирлиги, Бош прокуратура, Коррупцияга қарши курашиш агентлиги томонидан БМТ Тараққиёт дастурининг “Ўзбекистонда самарали, ҳисобдор ва шаффоф бошқарув институтлари орқали коррупцияга қарши курашиш” қўшма лойиҳасининг молиявий ва техник кўмагида ташкил этилди. 

Тадбирда Бош прокуратура, Адлия вазирлиги, Коррупцияга қарши курашиш агентлиги ҳамда бошқа қатор вазирлик ва идоралар, фуқаролик жамияти институтлари мансабдор шахслари, ОАВ вакиллари ва халқаро экспертлар иштирок этди. 

Форум иштирокчилари жорий йилда коррупцияга қарши курашиш бўйича амалга оширилаётган чора-тадбирлар ва комплекс фаолиятнинг боришини муҳокама қилди. Бу борадаги ютуқ ва камчиликлар, шунингдек халқаро ва минтақавий ташкилотлар билан ҳамкорликда амалга оширилаётган ишлар таҳлил этилди. 

Сессиялар давомида иштирокчилар, шунингдек, давлат органлари фаолиятига коррупцияга қарши курашишни интеграция қилиш, мамлакатимизда самарали, шаффоф ва ҳисобдор бошқарув институтларини шакллантириш, давлат органлари фаолиятига коррупцияга қарши “комплаенс назорат” тизимини жорий этишни кенгайтириш ҳақида тўхталди. Шунингдек ISO 37001 га мувофиқ коррупцияга қарши курашиш бўйича миллий менежмент тизимларини сертификатлаштиришнинг ўзига хос жиҳатлари ҳақида маълумотлар берилди. 

Бош прокуратура, Адлия вазирлиги ва БМТ Тараққиёт дастурининг қўшма лойиҳаси доирасида амалга оширилаётган ишлар самара бераётганига урғу берилди. 

Форум якунида коррупцияга қарши курашиш бўйича ишларни жадаллаштириш, давлат органлари ва ташкилотлари фаолиятига коррупцияга қарши комплаенс назорат тизимини жорий этиш зарурлиги қайд этилди. Бу соҳада давлат органлари ва фуқаролик жамияти институтлари ҳамда халқаро ташкилотлар ҳамкорлигини янада кенгайтириш мақсадга мувофиқлиги таъкидланди.

Муаттар Бурҳонова, ЎзА