Олмалиқ шаҳридаги “Металлург” маданият саройида 9 декабрь – Халқаро коррупцияга қарши курашиш кунига бағишланган аксилкоррупция ойлиги доирасида “Очиқ эшиклар куни” тадбири бўлиб ўтди.

Унда Олий Мажлис Сенатининг Суд ҳуқуқ масалалари ва коррупцияга қарши курашиш қўмитаси раиси Абдуҳаким Эшмуродов, Олий Мажлис Қонунчилик палатаси депутати, Суд-ҳуқуқ ислоҳотлари ва коррупцияга қарши курашиш қўмитаси аъзоси Азиза Аминова, Ўзбекистон Республикаси ИИВ Академияси профессори, полковник Шариф Қобилов, ОКМК бошқарув раисининг ходимлар ва ижтимоий масалалар бўйича ўринбосари Саъди Шерматов, комплаенс хизматлари, суд, ҳуқуқ-тартибот идоралари масъуллари ва жамоатчилик вакиллари иштирок этди. 

Тадбирда сўз олганлар мамлакатимизда ҳамда комбинатда коррупцияга қарши курашиш соҳасида амалга оширилган ишлар тўғрисида йиғилиш қатнашчиларига батафсил маълумот берди. Аксилкоррупция ойлиги давомида комбинат ишчи-ходимлари ўртасида ўтказилган коррупцияга қарши курашиш мавзусида “Энг яхши мақола”, “Энг яхши шеър”, “Энг яхши расм” ва “Энг яхши видеоролик”, “Энг яхши тақдимот” бўйича танлов ғолиблари, “Заковат” интеллектуал ўйинининг ғолиб жамоалари, мини футбол мусобақасида муваффақиятга эришган жамоалар пул мукофотлари билан рағбатлантирилди. 

Шунингдек, тадбирда Олий Мажлис Сенатининг Суд ҳуқуқ масалалари ва коррупцияга қарши курашиш қўмитаси раиси Абдуҳаким Эшмуродов  сўзга чиқиб, мамлакатимизда коррупцияга қарши курашиш борасида амалга оширилаётган ишлар ва бу борада миллий қонунчилик асослари бўйича  маъруза қилди. Айниқса, бугун арзимас бўлиб кўринган маиший коррупциянинг турли кўринишларига қарши аёвсиз курашиш лозимлигини таъкидлади. Шундан сўнг “Металлург” маданият саройи бадиий жамоалари ўз чиқишлари билан барчага яхши кайфият улашди. 

Маълумотларга кўра, комбинат тизимида ўтказилаётган “Коррупцияга қарши курашиш умуммиллий вазифа, ҳар бир ватанпарвар юртдошимизнинг виждон иши” шиори остидаги аксилкоррупция ойлиги доирасида бир қатор тадбирлар ташкил этилди. Долзарб ойликдан кўзланган асосий мақсад салбий иллатни йўқ қилиш, комбинат фаолиятида тўлиқ шаффофлик, очиқлик ва ҳисобдорликни таъминлаш, элликдан зиёд завод ва фабрика ва цехларда, 35 минг кишилик йирик жамоада меҳнат қилаётган барча даража ва бўғиндаги раҳбарлар, ишчи ва ходимларда коррупцияга нисбатан қатъий, муросасиз муносабатни шакллантиришдан иборатдир. 

Шунингдек, комбинат ва унинг таркибий бўлинмаларида ҳалоллик, поклик, адолат ва қонунийлик тамойилларининг изчил қарор топиши ҳамда уларнинг амалиётда кенг қўлланишини таъминлаш пировард мақсад саналади. Ойлик доирасида, комбинат марказий аппарати ва таркибий бўлинмаларида кенг қамровли профилактик чора-тадбирлар, коррупцияга қарши курашиш бўйича ўқув-семинарлар, очиқ мулоқотлар, танловлар, спорт мусобақалари, аҳоли ва ишчи-ходимлар ўртасида коррупцияга қарши иммунитетни оширишга қаратилган ахборот-тарғибот ишлари амалга оширилмоқда. 

А.Мусаев, ЎзА.