“Адолат” СДП сайловолди дастурида коррупция билан курашиш нафақат давлат органлари ва ҳуқуқни муҳофаза этиш тузилмаларининг вазифаси, балки бутун жамиятнинг бурчи эканлиги белгиланган. Партия тегишли давлат органлари билан ҳамкорликда мамлакатимизни коррупцияга муросасиз 50 та давлат қаторига кириш, қонунчилик нормаларининг бузилишига, уларнинг нотўғри ва ўзбошимчалик билан талқин этилишига чек қўйиш ҳамда тўрачилик, расмиятчилик ва коррупцияга қарши кескин кураш олиб бориш тарафдори эканлиги белгиланган.

Ушбу партия сайловолди дастурида белгиланган вазифалар мамлакатимизда илк бор ўтказилган Коррупцияга қарши курашиш бўйича юксак халқаро тадбирда давлатимиз раҳбари томонидан илгари сурилган таклиф ва ташаббуслар билан ҳамоҳангдир.

Бугун Тошкент шаҳрида Қатар давлати Амири томонидан таъсис этилган Коррупцияга қарши курашиш бўйича юксак халқаро мукофот билан тақдирлаш маросимида президентимиз Ўзбекистонда сўнгги йилларда коррупцияга қарши курашиш йўналишида амалга оширилган ижобий натижалар билан бир қаторда, келгусида амалга оширилиши белгиланган мақсадларга ҳам тўхталиб ўтди. 

Шу билан бирга, коррупция хавфини, минтақавий ва глобал даражадаги таъсирини бартараф этишга қаратилган муҳим ташаббусларни илгари сурди. 
Хусусан, Ўзбекистон коррупцияга қарши курашиш жараёнида ҳуқуқий ва институционал ислоҳотларни тизимли амалга ошираётгани, БМТ, Иқтисодий ҳамкорлик ва тараққиёт ташкилоти каби нуфузли халқаро тузилмалар билан яқин ҳамкорлик қилиб келаётгани таъкидланди. Коррупцияга қарши курашиш тўғрисидаги қонун қабул қилиниб, махсус ваколатли агентлик ташкил этилгани эътироф этилди.

Шунингдек, Ҳукумат фаолиятининг очиқ ва ошкоралигини таъминлаш, масъулиятини ошириш, бюрократияни камайтириш ва давлат хизматларини соддалаштириш, коррупциянинг олдини олишга қаратилган превентив механизмлар амалиётга кенг жорий этилмоқда. Барча давлат идораларида комплаенс ва самарадорликни баҳолаш рейтинг тизимлари йўлга қўйилиб, давлат харидлари тўлиқ рақамлаштирилди.

Ўзбекистон 2021 йилда Халқаро Очиқ маълумотлар хартиясига аъзо бўлди. Дунёнинг нуфузли “Transparency International” индексида 42 поғонага кўтарилди ва бу борада минтақада энг юқори ўринни эгаллаб келмоқда. 2030 йилга қадар мазкур рейтингдаги ўрнимизни яна 50 поғонага яхшилаш мақсад қилинган.

Албатта, ушбу эришилган натижалар, тўпланган билим ва тажриба, Қатар давлати каби коррупцияга қарши курашишда юксак натижаларга эришган мамлакатлар билан ҳамкорлик алоқаларининг кенгайиб бораётганлиги келгусида ушбу йўналишда янада юқори натижаларга эришиш имконини беради.

Шу боис, давлатимиз раҳбари ўз маърузасида Янги Ўзбекистонда коррупцияга қарши курашиш борасида ҳам катта режа ва вазифалар белгиланганлигини, хусусан, Коррупцияга қарши курашиш бўйича 2030 йилгача мўлжалланган миллий стратегия ишлаб чиқилиб, ҳаётга татбиқ этилиши, унда давлат идоралари фаолиятининг янада шаффофлигини таъминлаш ва ҳисобдорлигини ошириш, очиқ маълумотлар тизимини такомиллаштириш, соҳанинг ҳуқуқий асослари ва институционал механизмларини мустаҳкамлашга алоҳида урғу берилишини айтиб ўтди.

Ўзбекистон коррупцияга қарши курашдаги минтақавий ва глобал ташаббус ҳамда янги лойиҳаларни қўллаб-қувватлашини, ўзаро тажриба алмашиш, мулоқотларни кучайтириш, илмий изланишлар олиб бориш мақсадида Коррупция муаммолари бўйича минтақавий тадқиқот марказини ташкил этишни таклиф этди. 

Шунингдек, Коррупцияга қарши курашиш агентлигининг хорижий турдош муассасалар билан яқин ҳамкорлигини кучайтириш орқали унинг салоҳият ва имкониятлари янада оширилиши, коррупция ҳолатлари бўйича “дастлабки ўрганиш” – коррупцион суриштирув институтини жорий этиш, оммавий ахборот воситалари билан ҳамкорликни кенгайтириш, улар таъсирини янада ошириш учун Глобал медиа форумни ўтказиш таклифларини ҳам билдирди.

Албатта, бугун коррупция шиддат билан ўзгараётган дунёдаги энг долзарб муаммолардан бири бўлиб қолмоқда. Сабаби, бугун коррупция иллати бутун инсониятга, барча жамиятлар асосига, иқтисодий тараққиётга зарба берадиган, қонун устуворлигини бузадиган ва халқнинг давлат сиёсатига ишончини кескин сусайтирадиган, демократик институтлар ривожига тўсқинлик қиладиган хатарли таҳдидга айланиб бормоқда.

Шу боис, жамиятда коррупцияга нисбатан мутлақо тоқатсизлик маданиятини шакллантириш, унинг ҳар бир кўринишига қарши муросасиз курашиш барчамизнинг асосий вазифамиз саналади.

Олтиной Мамирова,

Олий Мажлис Қонунчилик палатаси депутати.  ЎзА