Исроил бош вазири Бинямин Нетаняхунинг баёнот беришича, коронавирус туфайли юзага келган вазият, мамлакатга ўз ҳукуматини шакллантириб олишга ёрдам бериши керак, деб ёзади The Jerusalem Post. Исроилда мана бир неча ой бўляптики, сиёсий беқарорлик сабабли янги ҳукуматни шакллантиришнинг имкони бўлмаяпти.

“Мен чекланган муддатга фавқулодда вазирлар маҳкамасини зудлик билан шакллантиришни таклиф этаман. Келинг, сиёсатни бир четга суриб турайлик”, — деди Нетаняху, ўзининг асосий рақиби, “Кахоль-Лаван” блоки раҳбари Бени Ганцга мурожаат қила туриб. Ўз навбатида, у ҳам мазкур масалани муҳокама қилишга рози бўлган.

Ҳозирда Исроил сиёсий боши берк кўчага кириб қолган. Янги бош вазирни сайлашнинг имкони бўлмаяпти, аввалгисининг иши эса судда кўрилмоқда.

Коронавирус туфайли Исроил 10 мартдан бошлаб бошқа мамлакатлардан келадиган туристлар учун чегарасини ёпди. Мамлакат туризм вазирлигининг маълум қилишича, мамлакатга ким келадиган бўлса, икки ҳафталик мажбурий карантинга жўнатилади. Ҳукуматнинг ушбу кўрсатмаси 12 мартдан 26 мартгача амал қилади.

2 мартда бўлиб ўтган парламент сайловида Нетаняхунинг “Ликуд” партияси парламентдаги 120 ўриндан 35 тасини эгаллашга муваффақ бўлди. Бени Ганц раҳбарлик қилаётган “Кахоль-Лаван” блоки эса 32 ўринга эгалик қилган.

Сайловдан кейин Нетаняхуга бош вазир бўлиши учун анчайин мураккабликлар юзага келди. Гап шундаки, ҳукумат коалициясини шакллантириш учун унинг партияси камида 61 ўринга эга бўлиши лозим бўлади, аксинча бўлса, ҳукумат фаолият олиб бора олмайди. Ликудчилар коалиция тузиб аранг 58 та ўринга эгалик қила олди, холос.