Республикамизнинг кичик бизнес, тадбиркорлик ва саноат марказига айланган Наманган вилоятига хорижий инвесторларнинг қизиқиши тобора ортиб бормоқда.

Корея Республикасининг қурилиш соҳасида жаҳонга машҳур ишбилармонларидан иборат делегациянинг юртимизга ташрифи бунинг ёрқин далилидир.  

Меҳмонлар Наманган вилояти ҳокими Шавкат Абдураззоқов томонидан  қабул қилинди.

[gallery-26027]

– Янги Ўзбекистондаги, хусусан, Намангандаги ижобий ўзгаришларни эшитиб, қизиқиш билан келдик, бу гўзал заминда йирик лойиҳаларни амалга оширмоқчимиз, – дейди "The Washington Times" фонди директори Янг Чанг Шик. – Делегациямиз таркибида "Lotte" корпорацияси директорлар кенгаши аъзоси Ли Сонг Хун, "PDI Design Group" архитектура ва лойиҳалаштириш компанияси директори Хю Стефан Сингхве, "De Catle industries" қурилиш компанияси директори Чо Кве Юн каби қурилиш соҳасида тажрибали тадбиркорларимиз бор.

Ўзаро мулоқотда Давлатобод туманидаги Янги Наманган шаҳарчасида жанубий кореялик инвесторлар томонидан амалга ошириладиган лойиҳа муҳокама қилинди. Ушбу шаҳарчада чет эллик ҳамкорлар янги тураржой мажмуаси, меҳмонхона бунёд этишни режалаштирган.

Учрашувда ҳамкорликни мустаҳкамлаш, янги лойиҳани ҳаётга тадбиқ этишга тезроқ киришиш юзасидан келишиб олинди.

Оқилхон Дадабоев, Ҳотам Мамадалиев (сурат), ЎзА