Бугун, 2 ноябрь куни Корея Республикасининг Кванжу шаҳрида “Bitgaram International Ехроof Electric Power Technology/ВIXPO-2022” халқаро энергетика кўргазмаси ва анжумани ўз ишини бошлади.

Бу ҳақда халқаро кўргазмада Ўзбекистон делегацияси аъзоси сифатида қатнашаётган Энергетика вазирлиги матбуот хизмати бош мутахассиси Обиджон Дилмуродов хабар берди.  

 – Мазкур тадбир Кореянинг йирик электр энергетика компанияси – “Korea Electric Power Corporation” (KEPCO) томонидан ўтказилмоқда. Унда дунёнинг 20дан ортиқ мамлакатидан келган энергетика компаниялари қатори Ўзбекистон  Республикаси Энергетика вазирлиги делегацияси ҳам иштирок этмоқда. Кўргазма углерод нейтраллиги ва энергия хавфсизлиги масалаларига бағишланган бўлиб, унда бир қатор масалалар, хусусан,  электр энергияси қувватларини оширишда яшил энергетиканинг улушини кўпайтириш, энг замонавий энергия тежовчи қурилмаларни жорий этиш, энергия ресурсларидан самарали ва оқилона фойдаланиш, бунинг натижасида атмосферага зарарли чиқиндилар чиқишини олдини олиш каби муҳим масалалар илгари сурилмоқда, – деди О.Дилмуродов.  

 Шунингдек, бугун мазкур халқаро кўргазма доирасида Энергетика вазирлиги делегацияси ва KEPCO компанияси президенти билан учрашув ўтказилади.  

 Маълумот ўрнида, 1 ноябрь куни Энергетика вазирлиги делегацияси Корея Республикасининг Чханвон шаҳридаги йирик “Doosan Enerbility” компанияси фаолияти билан танишди. Мазкур компания барча турдаги электр станциялар ва нефть-газ саноати учун энг замонавий энергоқурилмалар ишлаб чиқаради ҳамда уларни ўрнатиш, хизмат кўрсатиш ишларини олиб боради.  

 Томонлар учрашувида “Doosan Enerbility” компанияси раҳбарияти сўнгги йилларда Ўзбекистонда энергетика соҳасида амалга оширилаётган ишларни эътироф этди.  

 “Bitgaram International Ехроof Electric Power Technology/ВIXPO-2022” халқаро энергетика кўргазмаси 4 ноябрда ўз ишини якунлайди.  

 Насиба ЗИЁДУЛЛАЕВА, ЎзА