2025 йил 13 май куни тахминан соат 20:00 да, А 373 “Тошкент-Оҳангарон-Ангрен-Қўқон-Шаҳрихон-Андижон” автомобиль йўлининг 85-километридаги “Қорабоғсой” кўприги четидаги охирги оралиқ қурилмаси, яъни пиёдалар йўлаги синиши оқибатида ушбу йўналиш бўйича автомобиллар ҳаракати вақтинча чекланиб, ҳаракатланиш вақтинча Д 019 “Ангрен шаҳрини айланиб ўтиш” автомобиль йўлига ўтказилганлиги маълум қилинди.

Қайд этилишича, А 373 “Тошкент-Оҳангарон-Ангрен-Қўқон-Шаҳрихон-Андижон” автомобиль йўлининг 85-километрида жойлашган “Қорабоғсой” кўприги 1969 йилда “МСУ-14 трест УЗ мостстрой” томонидан қуриб фойдаланишга топширилган. 1995 йилда эса реконструкция ишлари амалга оширилган. “Ўзйўлкўприк” кластерининг Кўприк ва сунъий иншоотларни диагностика қилиш бўлими мутахассислари томонидан Автомобиль йўллари қўмитасининг мурожаатига асосан қисқа муддатда мазкур кўприкда ўрганиш ишлари амалга ошириб, тегишли хулоса тақдим этилди. 

Унга кўра, кўприк конструкцияси техник ҳолати ўрганилганда оралиқ қурилма тўсинларининг эскиргани, тўсинларнинг амалдаги юкламаларни кўтара олмаслиги, кўприк устки қопламаси қалинлиги меъёридан ортиб тўсинларга ортиқча юк бераётгани маълум бўлди. Шу билан бирга, тўсинлар ўзаро яхлит бўлмай, алоҳида элемент сифатида ишлаётгани ҳамда кўприк устки қопламасидаги ёриқлардан ва қатнов қисми қопламасининг чекка қисмларидан оқиб тушган сувлар тўсинларни бутун танаси бўйлаб тарқалиб, коррозияга учраганлиги, тўсинлардаги ёриқлардан сув сизиб кириб ишчи арматураларини ҳам коррозияга учратганлиги аниқланди. Шундан сўнг кўприкнинг умумий техник ҳолати қониқарсиз ҳолатда дея баҳоланди. 

Келгусида содир бўлиши мумкин бўлган авария ҳолатларининг олдини олиш мақсадида кўприкда тўлиқ реконструкция ишларини олиб бориш лозимлиги, кўприк жойлашган автомобиль йўли I тоифага тўғри келгани, кўприк габарити автомобиль йўлига мос эмаслиги, автомобиллар ҳаракатида айнан кўприк жойлашган оралиқда тирбандликлар ҳосил бўлаётганини инобатга олинмоқда. 

Кўприк реконструкция ишлари доирасида автомобиль йўли тоифасига ва замонавий А 14, НК 100 меъёрий талабларга мос бўлган янги кўприкни қуриш мақсадга мувофиқлиги айтилди. 

А.Мусаев, ЎзА.