Дания Қироллиги пойтахти Копенгаген шаҳрида минглаб одам АҚШ Президенти Дональд Трампнинг Гренландияни назорат қилиш режасига қарши намойиш ўтказиш учун тўпланди. Одамлар “Гренландия сотилмайди” ёзувли шиор кўтариб, Америка элчихонаси томон юриш қилган.

Намойиш иштирокчилари Гренландиянинг ўз тақдирини ўзи белгилаш ҳуқуқини қўллаб-қувватлаб, АҚШ аралашуви таҳдидига қарши эканликларини таъкидлаганлар. Мамлакатнинг бошқа шаҳарларида ҳам ташкил қилинган шунга ўхшаш митингларнинг навбатдагиси Гренландия пойтахти Нуукда режалаштирилган.

Айни пайт Данияга етиб келган АҚШ Конгресси делегацияси Қўшма Штатлар Дания суверенитети ва Гренландиянинг мухтор ҳуқуқини қўллаб-қувватлаши ҳамда ҳурмат қилишига ишонтирган.

С.Раҳимов, ЎзА