Баъзи кўп қаватли уйлар ертўласида маълум бир йўналиш бўйича тадбиркорлик фаолияти йўлга қўйилганига гувоҳ бўламиз. Аммо бу каби ертўлаларда тадбиркорлик билан шуғулланишнинг белгиланган талаблари борлигини ҳаммамиз ҳам билавермаймиз.

Хўш, бу қанақа талаблар? Уй-жой коммунал хизмат кўрсатиш вазирлигининг Кўп хонадонли уй-жой фондидан фойдаланишни назорат қилиш инспекцияси бўлим бошлиғи Абдуназар Пардаев ушбу талаблар ҳақида қуйидагиларни маълум қилди.

- Вазирлар Маҳкамасининг тадбиркорлик субъектларини кўпайтириш, аҳоли бандлигини таъминлаш бўйича тегишли қарори билан кўп қаватли уйларнинг ертўласида тадбиркорлик фаолиятини олиб боришга рухсат берилган, – дейди А.Пардаев. 

– Ертўладан тадбиркорлик мақсадида фойдаланишнинг ўз тартиб-қоидаси бор, албатта. Аввало, аҳоли хавфсизлиги учун бир қатор талаблар мавжуд. Ўзбекистон Республикасининг 2019 йил 6 августда қабул қилинган “Кўп қаватли уйларни бошқариш тўғрисида”ги қонунида белгилаб қўйилганидек, мажбурий нормалар ёнғинга қарши, санитария, шаҳарсозлик нормаларини, кўп квартирали уйга хизмат кўрсатиш бўйича тадбирларни ўз ичига олади.

Бугунги кунда Тошкент шаҳрининг Сергели, Янги ҳаёт каби туманларида синов тариқасида кўп қаватли уйларнинг ертўлалари тадбиркорларга берилган. Ертўлалардан асосан, тикувчилик цехларини очиш, сартарошхоналар ташкил қилиш, газета ва журналлар сотиш каби йўналишларда фойдаланилмоқда. Кўп қаватли уйларнинг ертўласидан фойдаланишда шовқин чиқарувчи, нохуш ҳидларни келтирувчи каби фаолият турларига рухсат этилмайди. 

Тадбиркор бу каби ертўлалардан фойдаланиш учун кўп қаватли уйларга хизмат кўрсатувчи бошқарув органларига ўзининг номидан ариза, тадбиркорлик фаолият турининг лойиҳаси, қанча иш ўрни яратиши ҳақида маълумот билан мурожаат қилиши лозим. Мазкур ертўлалардан фойдаланиш жараёнида у ерга ўзбошимчалик билан ўзгартиришлар киритиш тақиқланади. Агар тадбиркор томонидан мазкур ертўлаларга эшик, дераза каби қўшимча қурилишлар киритилмоқчи бўлса, Қурилиш вазирлиги ҳузуридаги Қурилиш соҳасидаги назорат инспекциясининг махсус рухсатномаси керак бўлади.

Муҳайё Тошқораева, ЎзА