Андижон вилояти божхона бошқармаси матбуот хизматининг маълум қилишича, бошқарма ходимларининг саъй-ҳаракатлари билан “Дўстлик” чегара постида 113 минг АҚШ доллари миқдоридаги валютани юртимиздан ноқонуний олиб чиқиб кетилишининг олди олинди.

Юртимизга “Дўстлик” чегара пости орқали Қирғизистон Республикасига ўтиб кетиш мақсадида кириб келган фуқаро З.Я. божхоначилар оғзаки сўровида валюта бойликлари йўқлигини маълум қилганидан сўнг ушбу шахсга тегишли бўлган буюмлар белгиланган тартиблар асосида холислар иштирокида кўздан кечирилганида нонлар орасига қора рангли полиэтилен пакетга ўраб қўйилган 73 минг 815 АҚШ доллар миқдордаги пул борлиги маълум бўлди. Шундан сўнг З.Я. холислар иштирокида божхона кўригидан ўтказилганида унинг эгнидаги кийимлари ичига яширилган яна 40 минг  АҚШ доллари мавжудлиги аниқланди.

Текширув тадбири натижасида божхона декларациясида кўрсатилмаган ва божхоначилар оғзаки сўровида маълум қилинмаган жами 113 минг 815 АҚШ доллари миқдоридаги валюта мамлакатимиз ҳудудидан ноқонуний тарзда олиб чиқиб кетилишига чек қўйилди.

Ушбу ҳолат бўйича тегишли баённома расмийлаштирилиб, ноқонуний олиб ўтилаётган валюта ашёвий далил сифатида олиб қўйилди. Мазкур ҳуқуқбузарлик юзасидан дастлабки суриштирув ишлари олиб борилмоқда.

Ф.Убайдуллаев, ЎзА