Навоий давлат педагогика институтининг ахборот-кутубхона марказида Қурилиш ва уй-жой коммунал хўжалиги вазирлиги вилоят бошқармаси томонидан семинар-тренинг ўтказилди. Тадбирда кўп квартирали уйларни бошқариш тизимини янада такомиллаштириш, бошқариш органлари билан мулкдорлар ўртасидаги ҳамкорликни кучайтириш, аҳолига сифатли хизмат кўрсатишни ҳамда кўрсатилган хизматлар учун тўлов интизомини таъминлаш ҳамда соҳага етарли малака, кўникма ва моддий-техник базага эга бўлган бошқариш органларини жалб қилиш бугунги куннинг долзарб масалаларидан бири эканлиги таъкидланди.
–2024 йил 1 январдан бошлаб кўп квартирали уйлардаги кўчмас мулк билан боғлиқ битимларни тасдиқлаш тартиби белгиланди, – дейди вилоят Қурилиш ва уй-жой коммунал хўжалиги бош бошқармаси бошлиғи ўринбосари Нуриддин Жуманиёзов. – Унга кўра, битимларни тасдиқлаш нотариуслар томонидан Қурилиш ва уй-жой коммунал хўжалиги вазирлигининг ахборот тизими орқали тегишли мулкдорнинг мажбурий бадаллар ёки тўловлар бўйича қарздорлиги мавжуд эмаслиги текширилгандан кейин амалга оширилади. Шунингдек, умумий мол-мулкни сақлаш, ундан фойдаланиш ва уни таъмирлаш ҳамда кўп квартирали уйга туташ ер участкасини ободонлаштириш учун мажбурий бадалларнинг ёки тўловларнинг энг кам миқдори Қурилиш ва уй-жой коммунал хўжалиги вазирлиги томонидан белгиланади.
Уй-жой коммунал хўжалиги соҳасида кўп квартирали уйларни бошқаришни янада самарали ташкил қилиш юзасидан “Йўл харитаси” тасдиқланган. Унга кўра, Навоий шаҳрида эксперимент тариқасида кўп квартирали уйнинг умумий мол-мулкини сақлаш, ундан фойдаланиш ва уни таъмирлаш ҳамда кўп квартиралик уйга туташ ер участкасини ободонлаштириш учун мажбурий бадаллар ва тўловлардан қарздорлиги мавжуд мулкдорларни электр тармоқларидан ўчириш тартибини ишлаб чиқиш белгиланган.
Учрашувда бошқарув органларининг молиявий барқарорлигини таъминлаш, кўп квартирали уйларнинг энергия истеъмоли аудитини ўтказиш тизимини жорий этиш, кўп квартирали уйларнинг том қисмида тадбиркорлар томонидан ижара асосида қуёш панелларини жойлаштириш, “Менинг уйим” ахборот тизимида бошқариш органларининг электрон рейтинг тизимини янада такомиллаштириш юзасидан ўзаро фикр-мулоҳазалар билдирилди.
Семинар сўнгида журналистлар мавзу юзасидан ўзларини қизиқтирган саволларга жавоблар олди.
А.Бўриев,
ЎзА мухбири