"Кўп квартирали уйларни бошқариш тизимини такомиллаштириш” мавзусида хива шаҳрида пресс-тур ташкил этилди. пресс-турда Қорақалпоғистон Республикаси, Бухоро ва Хоразм вилоятида фаолият олиб бораётган журналист ва блогерлар иштирок этди.

Кейинги йилларда республикамиз бўйича кўп квартирали уйларни бошқариш тизимини такомиллаштириш, уй-жой мулкдорлари ширкатлари (УЖМШ) фаолиятини тубдан қайта кўриб чиқиш ва бошқарув сервис компанияларини (БСК) ривожлантириш чоралари кўрилмоқда. Шу сабабли уйларнинг техник ҳолатини яхшилаш, туташ ҳудудларни ободонлаштириш ва аҳолининг яшаш шароитларини яхшилаш борасида кенг кўламли ишлар амалга ошириб келинмоқда.

Шу билан бирга юзага келаётган муаммолар ва уларни бартараф этишга қаратилган қатор чора-тадбирлар механизми ишлаб чиқилган бўлиб амалиётга тадбиқ этилмоқда.

Хива шаҳридаги ширкатларнинг молиявий ҳолати таҳлил қилиниб, ширкатлар “яхши”(яшил), “ўрта”(сариқ) ва “оғир”(қизил) тоифаларга ажратилиб, “оғир” аҳволдаги ширкатларга бириктирилган уйлар “Бошқарув сервис компания”лари тасарруфига ўтказилмоқда.

Коммунал соҳада кенг қамровли хизмат кўрсатувчи бошқарув сервис компаниялари ташкил этилаётгани юзасидан айни пайтда Хива шаҳрида жами 154 та кўп квартирали уй-жойлар мавжуд бўлиб, 154 тасига 1 та уй-жой мулкдорлари ширкати ва янги ташкил қилинган 1 та бошқарув сервис компанияси хизмат кўрсатиб келмоқда.

“Обод махалла” дастури доирасида Хива шаҳарида жойлашган Бинокор маҳалласида 30 та кўп квартирали уйлар учун 896 млн. сўмлик таъмирлаш ишлари режалаштирилган бўлиб, ҳозирги кунда 12 та уйда таъмирлаш ишлари бажарилди.

Қорақалпоғистон Республикаси, Бухоро ва Хоразм вилоятида фаолият олиб бораётган журналистлар ва блогерлар Хоразм вилоятида "Кўп квартирали уйларни бошқариш тизимини такомиллаштириш” юзасидан олиб борилаётган ишлар ва ушбу йўналишда амалга оширилиши режалаштирилган лойиҳалар тўғрисида ўзларини қизиқтирган саволларига жавоб олди.

Аҳмаджон Шокиров, ЎзА