Туркиянинг Коня шаҳрида давом этаётган V Ислом бирдамлиги ўйинларининг енгил атлетика мусобақаларидаги айрим югуриш баҳсларида қайд этилган натижалар Халқаро енгил атлетика федерациясининг рейтинг баллари томонидан эътироф этилмайди.

Бу ҳақда "Коня-2021" ўйинларининг енгил атлетика баҳсларини кузатиб борган Халқаро енгил атлетика федерацияси техник комиссияси маълум қилди.

Уларнинг билдиришича, 11 август куни эрталаб мусобақалар бошланиши олдидан спортчиларнинг пойгаларида вақт бирлигини аниқлайдиган ишга тушириш тизимининг кабелларида техник носозлик юзага келган. Оқибатда дастлабки уч кун ичида спринт пойгаларда натижаларнинг тўлиқ аниқлиги тасдиқланмади, деган хулосага келинган.

Шундай бўлса-да, спортчиларнинг кўрсаткичлари "Коня-2021" медалларига лойиқ кўрилади. Аммо, Халқаро енгил атлетика федерациясининг рейтинг тақвимида қайд этилмайди, дейилади расмий ахборотда.

Эслатиб ўтамиз, Ислом бирдамлиги ўйинлари дастуридан ўрин олган енгил атлетика мусобақалари 8-12 август кунлари бўлиб ўтган.

Тўлқин Рўзиев, ЎзА