Бугун 18 август куни V Ислом бирдамлиги ўйинларининг сўнгги мусобақалари ҳамда ёпилиш маросими ташкил этилади.

Ўзига хос катта спорт байрамининг ёрқин кўриниши бўлган комплекс мусобақаларда 56 та давлатнинг 4 минг нафарга яқин спортчилари иштирок этди.

Бугун ўтадиган сўнгги мусобақалар кунида спортчилар каратэ, кикбоксинг, спорт гимнастикаси ва камондан отиш йўналишида V Ислом бирдамлиги ўйинларининг охирги 40 та медаллар жамланмаси учун майдонга чиқади.

Ортда қолган баҳслар якунига кўра, ўйинлар учун белгиланган 483 та медаллар жамланмасининг 343 комплекти ўз соҳибларини топди.

Кеча якунланган спорт турларидаги мусобақаларда вакилларимиз муносиб натижаларни қайд этди.

Каратэ. Ушбу спорт турининг 55 кг. вазн тоифасида иштирок этган ҳамюртимиз Севинч Раҳимова бронза медали учун ўтган жангда индонезиялик рақибасини мағлубиятга учратди. 67 килограмм вазнда баҳс олиб борган Садриддин Сайматов барча учрашувларни ғалаба билан якунлади. Финалда марокашлик каратэчини енгди ва Ислом бирдамлиги ўйинларининг чемпионига айланди.

Сузиш. Конядаги Олимпия ҳавзаси эркаклар ўртасида 4х100 метрга комплекс усулда сузиш дастурида йигитларимиз Ислом бирдамлиги ўйинлари рекордини ўрнатди. Ушбу йўналишда олтин медалга сазовор бўлган Алексей Тарасенко, Элдорбек Усмонов, Владислав Мустафин, Хуршиджон Турсунов иборат жамоа ғалабаси шарафига Ўзбекистон байроғи кўтарилиб, мадҳиямиз янгради. Шунингдек, 100 метрга эркин усулда сузиш дастуридаги баҳсларда ҳамюртларимиз Алексей Тарасенко 49.54, Хуршиджон Турсунов 49.61 сония натижа билан олтин ва кумуш медалларга эга чиқди.

Спорт гимнастикаси. Оксана Чусовитина, Дилдора Арипова ҳамда Оминахон Халиловадан иборат учлик кумуш медални ҳамда кўпкураш дастурида баҳс юритган Дилдора Арипова иккинчи бор 48.400 балл жамғариб, ўйинларнинг яна бир кумушига мушарраф бўлди.

Қиличбозлик. Рапира бўйича Ўзбекистон аёллар терма жамоаси Ислом бирдамлиги ўйинларининг финалида мезбонларга қарши баҳс олиб борди. Умида Илясова, Камила Мирзаева, Илайда Гедикли, Маржона Усмонова каби ёшлардан ташкил топган жамоамизга ҳал қилувчи баҳсда кумуш медални қўлга киритди.

Камондан отиш. Мазкур спорт турининг микст дастурида истеъдодли спортчиларимиз Амирхон Содиқов ҳамда Зиёдахон Абдусатторова жуфтлиги бронза медалини қўлга киритди.

Якунланиб бораётган V Ислом бирдамлиги ўйинларидаги медаллар жамғаришда Туркия вакиллари 127 та олтин, 97 та кумуш, 79 та бронза, жами 303 та медаллар билан якка пешқадамга айланиб олган бўлса, Ўзбекистон спортчилари 46 та олтин, 38 та кумуш, 56 та бронза, жами 140 та совринлар жамғармасига эга чиққан ҳолда 2-ўринни, 38-41-48(127) кўринишга эга Эрон учинчи поғонадан жой олиб турибди.

[gallery-8369]

Юқорида таъкидлаганимиздек, бугун Ислом бирдамлиги ўйинларининг қолган 40 та медаллар жамланмаси учун бўлиб ўтадиган муросасиз курашларда ҳамюртларимиз қайси дастурларда иштирок этади?

Ҳозирда Коняда фаолият кўрсатаётган Ўзбекистон спортчилар маркази вакилларининг билдиришича, камондан отишда бронза медали учун Озодбек Унгалов баҳс юритса, Оксана Чусовитина, Оминахон Ҳалилова, Дилдора Арипова спорт гимнастикасида, Зулхумор Турсуналиева (61), Бону Эгамбердиева(68), Улболсин Жангазиева 68), Алисултон Ҳожиева (84), Ғофуржон Зоҳидов(+84) каратэнинг ката ва кумите беллашувларида, шунингдек, Мавлонбек Муҳаммаджонов, Ҳасанжон Баратов, Дилрабо Тоирова, Робия Қўчқорова, Маҳлиё Абдуманнопова, Маҳмуд Ҳаётов, Муродбек Азимов кикбоксинг жангларида майдонга тушади.
 

Тўлқин Рўзиев, Муҳаммад Амин (сурат), ЎзА