8 кундан сўнг Хитой пойтахти Пекинда XXIV қишки олимпия ўйинларининг тантанали очилиш маросими бўлиб ўтади.

Хабар берганимиздек, дунёнинг 100 га яқин давлатидан 4 минг нафардан зиёд спортчилар қатнашадиган олимпия ўйинларининг тоғ чанғиси баҳсларида ҳамюртимиз Комилжон Тўхтаев Ўзбекистон шарафини ҳимоя қилади.

Шу кунларда Италиядаги “Kronplatz Racing Center” мажмуасида тайёргарлик машғулотларини олиб бораётган Комилжон билан боғландик ва сўнгги кунги машғулот жараёнлари ва қачон Олимпия ўйинларига йўл олиши ҳамда қайси кунлари баҳсларга киришиши билан қизиқдик.

– Комилжон, Олимпиада олди машғулотлари ниҳоясига етиб қолдими?

– Олимпиада олди машғулотларнинг якунланишига яна 3 кун қолди. Ундан кейин бир кунлик танаффус.

– Айнан қайси куни Италиядан Хитойга йўл оласизлар?

– Кеча Пекинга чипталарни олдик. Насиб этса 1 февраль куни самолётга чиқамиз ва 2 февраль куни мураббийларим ҳамроҳлигида Хитойдаги Олимпия шаҳарчасига етиб борамиз.

– Қишки олимпия ўйинлари дастури билан танишмисиз?

– Албатта.

– Сизнинг иштирокингиздаги баҳслар қайси кунлари ўтказилади?

– Олимпия ўйинлари дастури билан танишиб чиқдик. Дастурга биноан тоғ чанғисининг гигант слалом мусобақалари 13 февралда, слалом баҳслари 16 февралда ўтказилиши белгиланган.

– Пекинга етиб борганингиздан кейин ўртадаги икки ҳафталик муддатда нималар билан банд бўласизлар?

– Олимпиада дастурига мувофиқ, мусобақа майдонига мослашиш учун сўнгги машғулотларни ўтказамиз. Италияда ҳам Сан-Марино ва Грузия спортчилари билан биргаликда шуғулланган эдик. Пекинда ҳам улар билан биргаликда машғулотларга киришамиз.

– Олимпия ўйинларидаги бевосита иштирокингизни кўриш учун Пекинга уйдагиларингиз, хусусан отангиз Али Тўхтаев ҳам етиб келадими?

– Биласизки, қишки олимпия ўйинлари мураккаб эпидемиологик шароитда ўтказилмоқда. Шу боисдан ҳам уйдагилар, дадам баҳсларни Ўзбекистонда туриб томоша қилишади. Лекин улар билан кун ора гаплашиб турибман.

– Кайфиятлар қандай?

– Кайфиятим аъло. Давлатимиз томонидан барча шарт-шароит яратиб берилди. Қўллаб-қувватлаб туришибди. Муҳими, ишончни оқлашим керак. Диққат-эътиборим олимпия ўйинларида муносиб иштирок этишга қаратилган.

ЎзА мухбири Тўлқин Рўзиев суҳбатлашди