Навоий вилояти Учқудуқ туманидаги Шимолий кон бошқармаси бош муҳандисининг кончилик ишлари бўйича ўринбосари Нуриддин Камоловни кўпчилик яхши рационализатор сифатида билади. Доимо ишлаб чиқариш режаларини ўз вақтида бажариш учун режалар тузилса, айнан Нуриддин қайсидир конни кенгайтиришдан тортиб кон техникасига янгилик киритиб такомиллаштиришгача бўлган таклифларни илгари суради. Ва таклифларни амалга ошириш учун ўқийди, изланади, ҳаракат қилади.

Ана шу сабаб мана бир неча йилдан буён у “Навоий кон-металлургия комбинати” нинг айнан рационализаторлик йўналиши бўйича ўтказиладиган танловларда ғолиб бўлмоқда. Аслида “Навоий кон-металлургия комбинати” АЖ ёш ишчи-ходимлари учун яратаётган бундай имкониятлар уларнинг ишлаб чиқаришдан орттираётган тажрибаларини яна ишлаб чиқариш учун фойдали таклифларга йўналтиришга имкон бермоқда.

– Бу йилги танловда ўзим узоқ йиллар меҳнат қилган Шимолий кон бошқармасига қарашли “Шарқий” очиқ усулда қазиб олиш конидаги “Ближний-Приконтактовый”, “Восточный”, “Западный 1-2” ва “Западный 1-1” карьерларининг бош лойиҳасини ўзгартириш орқали транспорт харажатларини қисқартириш” номли рационализаторлик таклифим билан иштирок этдим, – дейди Нуриддин Камолов. – Таклиф этилган лойиҳанинг мазмуни шундан иборатки, ҳозирги вақтда, карьерлардаги кон массасини ташиш ва уларни ағдармаларга, тасдиқланган лойиҳа чегараси бўйича қопловчи кон массасини жойлаштириш бўйича муаммолар вужудга келмоқда. 

Ушбу муаммоларни ҳал қилиш, фойдали қазилма мавжуд бўлмаган ер майдонларига қопловчи кон массасини жойлаштириш ва лойиҳадаги мавжуд ағдармаларнинг аввалдан тўкилмаган майдонга тўкиш учун мукаммал вариант ишлаб чиқиш орқали ўз ечимини топади. Ушбу таклиф орқали “Шарқий” конда 42 миллиард сўм иқтисодий самарадорликка эришиш кутилмоқда.

Албатта лойиҳани амалга оширишнинг ўзи бўлмайди. Дастлаб муаммонинг ечимлари орасидан, тоғ-жинсларининг кон геологик, гидрогеологик ва геомеханик хоссалари ва лойиҳадаги карьерлардан чиқувчи асосий траншеялар, маъданларни жойлаштириш схемаси, карьерларнинг ривожланиш йўналишларини инобатга олган ҳолда амалдаги лойиҳага киритиладиган техник қарор “НКМК” АЖ бош мутахасислари билан келишилади. Сўнгра тегишли Давлат инспекциялари билан ва Республикамизнинг бош лойиҳачиси ҳисобланган ЎЗГЕОРАНГМЕТЛИТИ лойиҳалаш институтининг розилиги билан ишлаб чиқаришда қўлланилади.

Бугун ер ва унинг қаъри билан тиллашиб келаётган кончилар бундай ечимларни амалга ошириш орқали маҳсулот таннархини тушириш ва ишлаб чиқариш самарадорлигини ошириш учун мунтазам изланмоқда.

Лайло Каримова,

Шимолий кон бошқармаси ахборот хизмати раҳбари

ЎзА