Колумбия Президенти Густаво Петро АҚШнинг Венесуэлага ҳарбий аралашувини танқид қилиб, минтақадаги мамлакатларни бирдамликка чақирди.

У Лотин Америкаси ва Кариб денгизи тараққиёт банки (CAF) томонидан Панамада ташкил этилган Минтақавий иқтисодий форум очилиши маросимидаги нутқида, жумладан, шундай деган:

- Биз Каракас ёки Америкадаги бошқа бирор мамлакат шимолдан ёки жанубдан ракета нишонига айланишини истамаймиз. Халқларимиз тарихни шундай шакллантирганки, биз ўзимизни Лотин Америкаси ва Кариб денгизи цивилизацияси сифатида кўришни бошлашимиз керак.

Халқаро масалаларга эътибор қаратаркан, Петро гиёҳванд моддалар савдоси, иқлим инқирози ва кучайиб бораётган можаролар каби глобал таҳдидларга қарши туришнинг ягона йўли минтақавий интеграция эканини таъкидлади. Шунингдек, Лотин Америкасининг ҳақиқий кучи на ракеталар ва на пулга боғлиқлигига урғу бериб, ҳақиқий бойлик ўлароқ, дунё бўйлаб урушни тинчликка алмаштириш таклифини илгари сурди.

Мазкур йирик анжуманда Бразилия, Панама, Боливия, Ямайка, Эквадор ва Гватемала етакчилари, шунингдек Чилининг сайланган Президенти Хосе Антонио Каст ҳам иштирок этган.

Г.Сатторова, ЎзА