Олий таълим, фан ва инновациялар вазирлиги матбуот хизмати маълум қилишича, коллеж ва техникумларнинг 1-курслари учун ўқув жараёни 2024 йил 2 октябрдан бошланади. Ўқиш истагида бўлган талабгорлар жорий йилнинг 25 сентябрига қадар my.uzbmb.uz орқали онлайн ёки бевосита таълим муассасасига мурожаат қилиши лозим.

Ота-оналар ва абитуриентларнинг мурожаатларини инобатга олиб, шунингдек, касб эгаллаш истагида бўлган ёшларни қўллаб-қувватлаш мақсадида 2024/2025 ўқув йили учун коллеж ва техникумларга қабул қилиш бўйича қуйидаги имкониятлар тақдим этилмоқда:

Бўш ўринлар (вакант) мавжуд бўлган коллеж ва техникумларга абитуриентлар тест натижалари асосида иккита мутахассислик фани (фанлар кетма-кетлигидан қатъи назар)га мос бўлган тегишли касб (мутахассислик)ни танлаши мумкин. Абитуриентлар таълим тилини ўзгартирган ҳолда коллеж ва техникумларнинг тегишли касб ва мутахассисликларини танлаб, танловда иштирок этиши мумкин.

Қайд этилишича, кириш имтиҳонларида иштирок этиб, my.uzbmb.uz электрон платформаси орқали профессионал таълим муассасаларини танламаган абитуриентлар иш берувчилар билан тузилган шартномага мувофиқ коллеж ва техникумларга дуал таълим шакли бўйича тўғридан тўғри қабул қилинади. My.uzbmb.uz электрон платформаси орқали рўйхатдан ўтмаган ёки кириш имтиҳонларида иштирок этмаган, бироқ коллеж ва техникумларда кечки ёки сиртқи таълим шакли бўйича ўқиш истагидаги фуқаролар ёзма имтиҳонлар орқали тўлов-контракт асосида ўқишга қабул қилинади.

Коллеж/техникумларнинг кундузги таълим шакли касб ва мутахассисликлари учун танловда иштирок этмоқчи бўлганлар my.uzbmb.uz сайти орқали онлайн, кечки ва сиртқи таълим шаклларида ўқиш истагидагилар эса бевосита коллеж ва техникумнинг ўзига мурожаат қилиши лозим.

Муҳайё Тошқораева,  

ЎзА