Andijon mashinasozlik institutida ochiq eshiklar kuni bo‘lib o‘tdi.

Andijon mashinasozlik institutida ochiq eshiklar kuni bo‘lib o‘tdi.

Andijon viloyati hokimligi, Andijon mashinasozlik instituti, Toshkent shahridagi Turin politexnika universiteti hamkorligida tashkil etilgan tadbirda akademik litsey, kasb-hunar kollejlari bitiruvchilari va ularning ota-onalari ishtirok etdi.

Prezidentimiz rahnamoligida yosh avlodning zamonaviy bilim va kasb-hunarlarni puxta egallashi uchun yaratilayotgan sharoitlar, oliy o‘quv yurtlarining moddiy-texnik bazasini mustahkamlash, ta’lim sifatini yuksaltirish borasida amalga oshirilayotgan izchil ishlar yuksak samaralar berayotgani ta’kidlandi. Bu jarayonda akademik litsey va kasb-hunar kolleji bitiruvchilarini ta’limning keyingi bosqichiga jalb etish, ularning bandligini ta’minlashga alohida e’tibor qaratilmoqda.

Andijon mashinasozlik institutida 11 ixtisoslik yo‘nalishi bo‘yicha ta’lim beriladi. Talabalarning muayyan mutaxassislik bo‘yicha puxta bilim olishi uchun barcha sharoit yaratilgan. Zamonaviy jihozlangan o‘quv xonalari, maxsus ustaxona, laboratoriya, lingafon, informatika, internet, multimedia xonalari, axborot-resurs markazi, sport zali talabalar ixtiyorida.

Tadbirda kollej va litseylar bitiruvchilariga institutdagi mavjud mutaxassisliklar, shart-sharoit va imkoniyatlar, 2016-2017 o‘quv yili uchun belgilangan qabul kvotalari haqida ko‘rgazmali vositalar yordamida atroflicha ma’lumot berildi.

– Avtomobilsozlikka juda qiziqaman, – deydi Andijon mashinasozlik instituti qoshidagi 2-akademik litsey bitiruvchisi Jasurbek Mo‘minov. – Bugun institut va bu yerdagi mavjud ixtisosliklar haqidagi ma’lumotlar mening ishtiyoqimni yanada kuchaytirdi. Kelgusida ushbu yo‘nalishda o‘qib, malakali mutaxassis bo‘lmoqchiman.

Tadbir doirasida Toshkent shahridagi Turin politexnika universitetiga joriy yilgi qabul kvotalari, ta’lim yo‘nalishlari, kirish imtihonlari bo‘yicha taqdimot tashkil etildi. Ushbu universitetda o‘qish istagida bo‘lgan Farg‘ona vodiysi yoshlariga qulaylik yaratish maqsadida hujjatlar va kirish imtihonlarini Andijon mashinasozlik institutida onlayn tarzda topshirish imkoniyati yaratilgan.

Ishtirokchilarni qiziqtirgan savollarga mutaxassislar atroflicha javob qaytardi.