Иқтисодий тадқиқотлар ва ислоҳотлар маркази томонидан 2021 йил июнь ойида кўчмас мулк бозоридаги ўзгаришлар таҳлил қилинди.

Мазкур бозорларда талаб ўзгариши Ўзбекистонда иқтисодий фаоллик тикланганини кўрсатмоқда.  

 Жорий йилнинг июнь ойида мамлакатимизда кўчмас мулк бўйича расмийлаштирилган шартномалар сони 21,5 мингтани ташкил этди, бу май ойига нисбатан 16,8 фоизга кўпроқдир.  

 Таъкидлаш керакки, май ойида апрель ойига нисбатан бир оз пасайиш қайд этилган эди. 2019 йилнинг июнь ойи (14,3 минг) билан таққослаганда, кўчмас мулк олди-сотдиси бўйича тузилган шартномалари сони 50,6 фоизга ошди. Бироқ 2020 йил июнь ойига нисбатан (33,6 минг) 36 фоизга пасайиш қайд этилди. Бу, бир томондан ўтган йили локдаундан кейин карантин чораларининг босқичма-босқич юмшатилиши билан кўчмас мулк бозорида жонланиш қайд этилганлиги билан, бошқа томондан доимий рўйхатга олиш тартибининг соддалаштирилиши билан изоҳланади. Бунда, 2020 йилнинг июнь ойида мамлакатимизда кўчмас мулк бўйича расмийлаштирилган шартномалар сони 2019 йилнинг июнига (14,3 минг) нисбатан 135,2 фоизга ошган бўлса, Тошкентда бу кўрсаткич (2019 йилнинг июнида 4,5 минг) 148,7 фоизга кўпайганди.  

 Ҳудудлар кесимида республиканинг барча ҳудудларида май ойига нисбатан ўсиш кузатилди. Энг юқори ўсиш суръатлари Самарқанд (31,7), Фарғона (27,1), Наманган (26,2), Жиззах (25,7) ва Навоий (22,6) вилоятларида кузатилди.  

 Таҳлил натижалари шуни кўрсатадики, ипотека кредити ва кўчмас мулк савдоси ўртасида сезиларли даражада боғлиқлик мавжуд. Ипотека кредитлари сонининг 10 фоизга ошиши кўчмас мулк олди-сотдисининг ўртача 6,7 фоизга ўсишига олиб келади. Марказий банк маълумотига кўра, 2021 йилнинг январь-май ойларида аҳолига берилган ипотека кредитлари ҳажми 2,77 триллион сўмни ташкил этган бўлса, ушбу кредитлар сони 21,1 мингтага етди.  

 Шаҳноза Маматуропова, ЎзА