Bu koʻhna inshootning koʻk koshin bilan qoplangan gumbazi, peshtoqining oʻng va chap tomonidagi ustunlari, boloxonasi buzilib ketgan. Binoga sharqdan peshtoq (ravogʻining kengligi 10 m) orqali kiriladi. Peshtogʻida serjilo handasiy bezaklar koʻp ishlatilgan. Ustunlarida, asosiy ravoq va qanoslarida guldor sopollardan foydalanilgan. Xonaqoh (12,7x12,7 m) tashqi poy gumbazida moviy, koʻk va oq rangli bezaklar orasiga Qurʼon oyatlari bitilgan.

Ichki qismidagi 8 ta mayda ravoqchalar romb shaklidagi qalqonsimon bagʻallar bilan oʻzaro birlashtirilgan va ravoq shaklidagi 16 tayanchiqqa tayantirilgan. Gʻishtin devor burchaklaridagi 4 ta aylanma zina orqali ayvon tomiga chiqilgan. Ayvonning yon taxmonlariga keng ravoq orqali oʻtilgan. Hozir ular yopib qoʻyilgan.

Koʻk gumbaz masjidi oʻtgan asrning 70-yillarida hamda Amir Temurning 660-yilligi munosabati bilan (1995-96 yillar) qayta taʼmirlangan.