Buxoroda “Namunali kinologiya bo‘linmasi” va “A’lochi kinolog” ko‘rik-tanlovlarining mamlakat bosqichi bo‘lib o‘tdi.

Ko‘rik-tanlovda Qoraqalpog‘iston Respublikasi IIV, Toshkent shahar va viloyatlardan xodimlar xizmat itlari bilan qatnashdi.  

“A’lochi kinolog” ko‘rik-tanlovida ishtirokchilar 8 ta, ya’ni me’yoriy hujjatlar bo‘yicha test sinovlari, to‘sinda tortilish, qo‘l jangi, kinolog xodimning xizmat iti bilan saf tayyorgarligi, PM va AKM qurollarini to‘liqsiz qismlarga ajratish va yig‘ish, 25 metrli suv havzasini vaqtga yengib o‘tish, 3000 metr hamda 800 metr masofaga xizmat iti bilan yugurish yo‘nalishlari bo‘yicha sinovdan o‘tdi.  

Ko‘rik-tanlovning tantanali qismida IIV hamda Buxoro viloyati IIB mas’ullari so‘zga chiqib, jamoat tartibini saqlash, sodir etilayotgan jinoyatlarni fosh etish va ularni oldini olishda Kinologiya xizmati xodimlarining xizmatini e’tirof etdi. Shuningdek, bu kabi tanlovlar xodimlarda tajriba almashish bilan bir qatorda ularning keyingi faoliyatida muhim ahamiyat kasb etishi ta’kidlandi.  

[gallery-14784]

Ko‘rik-tanlovning umumiy natijalariga ko‘ra “Namunali kinologiya bo‘linmasi” yo‘nalishi bo‘yicha uchinchi o‘rinni Jizzax viloyati, ikkinchi o‘rinni Samarqand viloyati, faxrli birinchi o‘rinni Buxoro viloyati IIB JXX JTSB Kinologiya bo‘linmasi xodimlari qo‘lga kiritdi. Yakunda barcha yo‘nalishlar bo‘yicha g‘olib va sovrindorlar IIVning kubogi, diplom va qimmatbaho sovg‘alari bilan taqdirlandi.  

Zarif Komilov,

Tohirjon Istatov (surat), O‘zA muxbirlari.