Айни кунларда Кинематография агентлиги томонидан эълон қилинган «Сени соғиндик баҳор» шиори остидаги «Кинокарвон» акцияси иштирокчилари ҳудудларда бўлиб турибди.

Жумладан, ижодкорлар наманганлик киномухлислар билан учрашиб, самимий суҳбатлар қурди. Cўнгги йилларда суратга олинган «Ватан остонаси», «Мерос» бадиий фильмлари намойиш этилди.  

Яна бир гуруҳ киноижодкорлар эса самарқандлик киномухлислар билан учрашувлар ўтказди. Кино соҳасидаги янгиликлар, сўнгги йилларда ишлаб чиқарилаётган бадиий ва ҳужжатли фильмлар, уларда кўтарилган мавзу ва ғоялар ҳақида сўз юритилди. «Самарқандда қовун таровати», «Қуёш таъми» каби фильмлар намойиши томошабинларга манзур бўлди. 

Акция қатнашчиларининг яна бир гуруҳи Ўзбекистон Республикаси Қуролли кучлари Самарқанд марказий ҳарбий округининг «Маънавият ва маърифат» марказида ҳарбийлар билан учрашди. Кинематография агентлиги томонидан ҳарбийлар ҳаёти, юртимиз тинчлиги ва халқимиз осойишталигини таъминлашда улар кўрсатаётган мардлик ва жасорат ҳақида кўплаб бадиий ва ҳужжатли фильмлар суратга олинаётгани таъкидланди. Ҳарбийлар учун Ёлқин Тўйчиевнинг «Эврилиш» бадиий фильми намойиш этилди.  

«Кинокарвон» акцияси 26 апрелгача давом этади.  

 ЎзА