Самарқанд вилояти матбуот уйида ўтказилган брифингда Самарқанд вилояти санитария-эпидемиологик осойишталик маркази бош врачи Х.Боймуродов бу ҳақда маълумот берди.

Бош врачнинг маълум қилишича, шу пайтгача Самарқанд вилоятига коронавирус инфекцияси қайд этилган мамлакатлардан 851 нафар киши, жумладан, 22 нафар чет эл фуқароси келган. Уларнинг барчаси тиббий кузатувга олиниб, 538 нафари 14 кунлик кузатув муддатидан ўтган ва уларда ҳеч қандай касаллик аломатлари аниқланмаган.

Шунингдек, Самарқанд халқаро аэропорти ва Ургут туманидаги “Жартепа” чегара постида орқали вилоятга келаётган юртдошларимиз ва чет мамлакатлар фуқаролари ушбу масканлардаги санитария-назорат пунктларида белгиланган тартибда тиббий кўрикдан ўтказилмоқда. Бунинг учун назорат пунктлари зарур тиббий восита ва жиҳозлар, тана ҳароратини ўлчаш учун контактсиз термометр ва дистанцион тепловизор билан таъминланган. Ҳозиргача Самарқанд халқаро аэропорти орқали 306 рейс билан 8246 нафар (2548 нафари чет эллик), “Жартепа” чегара пости орқали 48799 нафар (31700 нафари чет эллик) фуқаро вилоятга келган. Уларнинг 123 нафарида тана ҳарорати юқорилиги кузатилиб, зарур чоралар кўрилди.

– Юртимизда коронавирус инфекцияси қайд этилгач, бизга кўплаб фуқаролар шу инфекция бўйича текширишни сўраб мурожаат қилмоқда, – дейди Х.Боймуродов. – Айни пайтда марказимиз вирусология лабораториясида 11 турдаги грипп ва ўткир респиратор вирусли инфекцияларни аниқлаш учун барча имконият бор. Лекин коронавирус бўйича текширувни амалга ошириш учун тиббий-диагоностик воситаларимиз чекланган ва бунинг учун белгиланган тиббий кўрсатмага амал қиламиз. Яъни, коронавирус кенг тарқалган мамлакатларда бўлган, юртимизга келганига 14 кун муддат ўтмаган ҳамда иситма ва бошқа касаллик белгилари кузатилган шахслар таҳлиллари лабораториямизда текширилади.

Брифингда қайд этилишича, Хитойда коронавирус аниқланганидан буён ўтган давр мобайнида аҳоли ўртасида олиб борилган тарғибот ишлари, шахсий гигиена қоидаларига қатъий амал қилиш туфайли вилоятда айрим юқумли касалликлар бир мунча камайди. Жумладан, ўтган йилнинг шу даври билан қиёслаганда, йил бошидан буён Самарқанд вилоятида ўткир респиратор вирусли инфекцияларга чалиниш 22 фоизга, вирусли гепатитнинг “А” тури 37 фоизга, ўткир ичак инфекцияси хасталиклари 12 фоизга камайганлиги кузатилган.