Венесуэла ҳуқуқ-тартибот органлари аксилкоррупция текшируви доирасида 19 нафар юқори лавозимли давлат хизматчиларини ҳибсга олди. Улар коррупция ишларига аралашганликда гумонланмоқда, деб хабар тарқатди ҳукуматнинг "Correo del Orinoco" газетаси.

“Айни пайтда 19 киши қўлга олинди, ишончим комилки, бу рақам ҳали ўзгаради. Коррупцияга қарши текширув ишлари энди бошланди, бир неча нафар судьялар ва мансабдор шахслар ҳибсга олинди”, - деб баёнот берди Миллий ассамблея раиси Хорхе Родригес.

“Ким ўғирласа, у албатта қамоқда ўтиради”, - дея қўшимча қилди мамлакат парламенти раҳбари.

Душанба куни Венесуэла Президенти Николас Мадуро мамлакат нефть саноати вазири Тарек ал-Айссамининг истеъфосини қабул қилганини маълум қилиб, давлатга қарашли PDVSA нефтгаз компаниясини коррупциядан тозалашга ваъда берганди.