Киев 2014 йилдан буён жанговар ҳаракатда иштирок этганлар сонини маълум қилди
Украинада 2014 йилдан буён давом этиб келаётган жанговар ҳаракатда мамлакатнинг бир миллионга яқин фуқароси иштирок этган, дея баёнот берди мудофаа вазири Алексей Резников.
“Укринформ” агентлиги унинг сўзларидан қуйидаги иқтибосни келтирган:
– 9 ярим йил ичида (Киев ҳарбий амалиётни 2014 йил Донбассда бошлаган) қарийб бир миллион жангчимиз ҳарбий ҳаракатда қатнашди. Биз уларнинг кундалик муаммоси ва вазифасини яхши биламиз. Барча масала устида иш олиб боряпмиз ва албатта ўзгариш бўлади.
Август ойи бошида “Тирик қайт” номли Украина қуролли кучларига ёрдам жамғармаси раҳбари Тарас Чмут “сафарбарлик ҳар бир украиналик эр кишига тегишли, мамлакат яна юз минглаб йигитларни фронтга жўнатишига тўғри келади”, дея баёнот берган.
Украинада 2022 йил 24 февралда ҳарбий ҳолат эълон қилиниб, эртасига Президент Владимир Зеленский умумий сафарбарлик ҳақидаги фармонни имзолаган.
ЎзА