Шу муносабат билан ташкил этилган тадбирда “Ипотека-банк” АТИБ бошқаруви раисининг биринчи ўринбосари Элёр Иномжонов ва ЕТТБнинг Марказий Осиё молиявий институтлар билан операциялар бўйича раҳбари Жаҳон Шамсиев ушбу икки молиявий ташкилотлар ўртасидаги ўзаро ишончли ҳамкорлик мамлакатимиздаги тадбиркорлик субъектлари фаолиятида муҳим аҳамият касб этаётганини таъкидлади.

Маросимда қайд этилганидек, “Ипотека-банк” АТИБ Европа тикланиш ва тараққиёт банки билан 2017 йилдан буён ўзаро ишончли ҳамкорлик қилиб келади. Ўтган давр мобайнида халқаро молия ташкилотининг 100 миллион доллардан ортиқ пул маблағи жалб қилинган. Ушбу маблағ ҳисобидан банк мижозларининг кичик ва ўрта бизнес субъектлари лойиҳалари молиялаштирилади. Ҳозирги кунда амалиётга татбиқ этилган 200 дан зиёд лойиҳалар шулар жумласидандир.

Бу йил ҳам “Ипотека-банк” АТИБ ва Европа тикланиш ва тараққиёт банки мамлакатимиздаги пандемия оқибатида зарар кўрган кичик ва ўрта бизнес субъектларига кўмак беришдек эзгу ишга қўл урди. Шу мақсадда ЕТТБ "Ипотека-Банк" АТИБ учун қўшимча линия ажратишга қарор қилди.

– Бугун банкимиз ЕТТБ билан кичик ва ўрта бизнес субъектларини қўллаб-қувватлаш учун 30 миллион доллар миқдорида ҳамда аёл тадбиркорлар фаолиятини янада ривожлантириш учун 10 миллион доллар миқдоридаги кредит маблағлари берилиши бўйича иккита шартномани имзолашга эришди, – деди “Ипотека-банк” АТИБ бошқаруви раисининг биринчи ўринбосари Э.Иномжонов. 

– Аҳамиятлиси, иккинчи шартномага асосан аёллар тадбиркорлигини қўллаб-қувватлаш йўналиши бўйича нафақат кредит маблағлари ажратилади, балки шу лойиҳа доирасида уларни ўқитиш, кўмак бериш, маҳсулотларни сотиш учун янги бозорларни топиш ҳамда сотишни тўғри амалга ошириш йўналишлари бўйича ҳам техник хизматлар кўрсатилади. Бу эса юртимиздаги хотин-қизлар ўз салоҳиятни синаб кўриш учун катта имкониятдир.

Таъкидлаш керакки, "Марказий Осиёда бизнесдаги аёллар" дастури ЕТТБнинг Ўзбекистонда тадбиркор аёлларни қўллаб-қувватлашга қаратилган биринчи лойиҳаси ҳисобланади. Ушбу дастурни амалга оширишда "Ипотека-банк" биринчи етакчи банк сифатида танланган бўлиб, унинг кенг тармоғи орқали аёллар тадбиркорлигини ривожлантиришга ҳисса қўшиш ушбу халқаро молия ташкилотининг асосий мақсадидидир.

– Мамлакатингизда кичик ва ўрта бизнес субъектларини қўллаб-қувватлаш йўналиши бўйича амалга оширилган лойиҳаларнинг бу –учинчисидир, – деди ЕТТБнинг Марказий Осиё молиявий институтлар билан операциялар бўйича раҳбари Ж.Шамсиев. – Бундан мақсад, “Ипотека-банк” АТИБ билан ҳамкорликда пандемия оқибатларидан зарар кўрган ушбу бизнес вакилларини молиявий жиҳатдан қўллашдир. 

Аёллар тадбиркорлигига кўмак беришга қаратилган иккинчи лойиҳамиз Ўзбекистонда илк бор амалга оширилади. Бу йўналиш биз учун жуда муҳим ҳисобланиб, аёллар тадбиркорлигини қўллаб-қувватлаш самарали эканига ишонамиз. Бу дастурда “Ипотека-банк” АТИБ иштироки бизни қувонтиради. Биз бугун 40 миллион доллар миқдоридаги маблағ бўйича иккита кредик шартнома имзоладик. 

2020 йил давомида “Ипотека-банк” АТИБ билан жами 80 миллион доллар миқдорида шартномалар тузганмиз. Биз ушбу банкка ишонамиз ва у билан ҳаркорликда ишлашни давом эттирамиз.