Айни кунларда Бизнес-омбудсман девони бошчилигидаги ўзбекистонлик мутахассислар кичик ва ўрта бизнесни ривожлантириш бўйича Япония тажрибасини ўрганиш мақсадида ўқув сафарида бўлиб туришибди.
Бугунги кунда Бизнес-омбудсман томонидан тадбиркорларни ҳимоя қилиш борасида 10 га яқин халқаро ташкилот билан ҳамкорлик алоқалари ўрнатилган.
Жорий йил якунига қадар халқаро ташкилотлар билан тадбиркорликни қўллаб-қувватлашга қаратилган бир қатор тадбирларни ўтказиш режалаштирилган.
Японияга амалга оширилган сафар давомида ҳам тадбиркорлар ҳуқуқларини ҳимоя қилувчи ташкилотлар билан ҳамкорлик алоқаларини ўрнатиш, ҳудудларда тадбиркор хотин-қизларнинг иштирокини кучайтириш, ижтимоий ҳимояга муҳтож аҳоли қатламини тадбиркорликка кенг жалб қилиш орқали доимий даромад билан таъминлаш масалалари кўриб чиқилади.
Япония халқаро ҳамкорлик агентлиги (JICA) кўмагида ташкил этилган ушбу ўқув сафарида 12 та давлат вакиллари қатнашмоқда. Бунда иштирокчилар Япониянинг кичик ва ўрта бизнесни ривожлантириш сиёсати билан танишади.
Шунингдек, соҳадаги муаммолар ва уларни ҳал қилиш чораларини муҳокама қилади ҳамда ўз таклифлари билан ўртоқлашишади.
Гулноза Бобоева,
ЎзА