Мамлакатимиз иқтисодиётида барқарор ривожланиш, атроф-муҳит муҳофазаси ва замонавий корпоратив бошқарув стандартларига риоя қилиш масалалари муҳим аҳамиятга эга. Айниқса, бу йўналишлар кичик ва ўрта бизнес субъектларининг рақобатбардошлигини ошириш, уларнинг экспорт салоҳиятини кучайтириш ва халқаро бозорлар билан ҳамкорлигини кенгайтиришда муҳим саналади.

Шу талабларга кўра, юртимизда ESG ва RBC - масъулиятли бизнес юритиш тамойилларини амалиётга татбиқ этиш бўйича изчил ишлар олиб борилмоқда.

Иқтисодиёт ва молия вазирлиги ҳамда Германия халқаро ҳамкорлик жамияти (GIZ) ҳамкорлигида ташкил этилган галдаги тадбир ҳам кичик ва ўрта бизнес учун экологик, ижтимоий ва корпоратив бошқарув ҳамда масъулиятли бизнес юритиш тамойилларини жорий этиш лойиҳаси ижросига бағишланди.

Маҳаллий ва хорижий экспертлар, мутахассислар иштирок этган ушбу тадбирда ESG ва RBC йўналишларида ўтказилган таҳлиллар тақдим этилди ҳамда соҳада мавжуд муаммолар ва эҳтимолий хавфлар юзасидан фикр алмашилди. Шунингдек, кичик ва ўрта бизнес учун миллий ESG тизими ҳамда стратегиясини ишлаб чиқишда устувор ҳисобланадиган ёндашувлар муҳокама қилинди.

Таъкидланганидек, мазкур стандартлар тадбиркорлик субъектларининг бозордаги мавқеини мустаҳкамлаш, ташқи савдо имкониятларини кенгайтириш ва халқаро иқтисодий маконга интеграциялашувини тезлаштиришга хизмат қилади.

Муҳокамалар чоғида кичик ва ўрта бизнес фаолиятининг бугунги ҳолати, улар дуч келаётган экологик, ижтимоий ва корпоратив бошқарувга оид масалалар атрофлича кўриб чиқилди. Шу билан бирга, тўқимачилик, озиқ-овқат саноати, кимё, қурилиш материаллари ҳамда машинасозлик тармоқларида учраётган асосий ESG хавфлари, шунингдек, институционал механизмлар ва мувофиқлаштириш тизимидаги айрим бўшлиқлар таҳлил қилинди.

Мутахассисларнинг фикрича, мазкур лойиҳанинг изчил амалга оширилиши кичик ва ўрта бизнес субъектларининг барқарор ривожланишини таъминлаш, уларни халқаро стандартларга мослаштириш ҳамда глобал қиймат занжирларидаги иштирокини янада кенгайтириш имконини беради.

Тадбир якунида ўтказилган таҳлиллар натижалари юзасидан умумий ёндашувлар маъқулланиб, кичик ҳамда ўрта бизнес учун миллий ESG тизими ва стратегиясини ишлаб чиқишнинг кейинги босқичларини амалга ошириш бўйича галдаги вазифалар белгиланди.

Н.Зиёдуллаева, ЎзА