ФОТОРЕПОРТАЖ

Фарғона вилояти Фурқат туманидаги чекка ҳудудлардан бирида  фаолият кўрсатаётган “Камол Қўчқоров файзи” паррандачилик комплекси Германия технологияси асосида ишлаб чиқаришни йўлга қўйган.

– Паррандачилик билан узоқ йиллардан бери шуғулланаман, - дейди мазкур комплекс  асосчиси Умаржон Қўчқоров. – Паррандачилик етти хазинанинг бири эканига  кўп йиллик фаолиятим давомида қайта-қайта амин бўлганман. Ишимни дастлаб ўнта хонаки парранда боқиш билан бошлаганман. Кейинчалик тадбиркорлар учун яратиб берилган шароитлар ҳамда эътибор ва имтиёзлар туфайли фаолиятимизни кенгайтирдик. Кичик паррандачилик фермаси замонавий йирик комплексга айланди.

Тажрибали фермернинг айтишича, паррандачиликда немис технологиясининг афзалликлари жуда кўп. Жараёнлар деярли юз фоиз автоматлаштирилган. Паррандаларни озиқлантиришдан тортиб, чиқиндиларни йиғиб олишда ҳам қўл меҳнати зарур эмас. Технологиялар ёрдамида махсус идишларга  йиғиладиган чиқиндилар пешма-пеш далаларга ташиб кетилади. Албатта, маҳсулот сонини кўпайтиришда товуқларнинг зоти ҳам катта роль ўйнайди. Шу боис бу ерда германиялик ҳамкасблар тавсияси билан “Ломан” зотли паррандалар парваришланмоқда. “Ломан”ларнинг маҳсулдорлиги маҳаллий зотларга нисбатан 30-40 фоизга кўпдир.  

[gallery-16039]

Айни кунларда 12 та иш ўрни яратилган комплексда 40 мингдан зиёд зотдор товуқлар парваришланиб, кунига 30-35 минг дона тухум олиняпти.  Табиийки, бу жараён истеъмол бозорида талаб катта бўлган паррандачилик маҳсулотларининг кўпайишига ҳамда нархлар барқарорлигига ижобий таъсир кўрсатади.  

Муқимжон ҚОДИРОВ (сурат), ЎзА