«Ўзстандарт» агентлиги фермер хўжаликлари ва экспортёр корхоналарни қўллаб-қувватлаш мақсадида Хитойнинг сертификатлаштириш ва инспекция гуруҳи (CCIC) экспертлари иштирокида онлайн ўқув семинари ташкил этди.

Унда «CCIC Almaty» ташкилоти бош директори Сюй Венсян, ушбу ташкилотнинг мувофиқликни баҳолаш бўйича экспертлари, «Ўзстандарт» агентлиги, «Ўзбекистон илмий-синов ва сифат назорати маркази» давлат корхонаси масъул ходимлари, фермер хўжаликлари ва экспортёр корхона вакиллари иштирок этди.

CCIC экспертлари иштирокчиларга презентация орқали қишлоқ хўжалиги ва бошқа турдаги маҳсулотларни Хитойга экспорт қилишдаги талаблар, синов ва сертификатлаштириш жараёнларини тушунтирди.

Шунингдек, жаҳон бозорида қишлоқ хўжалиги маҳсулотларига қўйилган сифат ва хавфсизлик талабларининг тобора кучайиб бораётганлиги сабабли, Хитой давлатида етиштирилаётган маҳсулотларнинг миллий ва халқаро бозорлардаги ўрнини мустаҳкамлаш учун GLOBAL GAP ва Organic стандартларни жорий этишга алоҳида эътибор берилаётганлигини таъкидлаб ўтилди.