Коронавирус эпидемиясининг олдини олиш ва унга қарши курашга амалий ёрдам кўрсатиш, зарур тавсия ва маслаҳатлар бериш мақсадида мамлакатимизга Хитой давлатидан тажрибали мутахассислар ташриф буюрган бўлиб, уларнинг бир гуруҳи Андижонда бўлди.

Маълумки, коронавирус инфекцияси Хитойнинг Ухань шаҳридан бутун дунёга тарқалди. Айнан Хитой биринчи бўлиб ушбу касалликка қарши курашди. Олиб борилган самарали чора-тадбирлар натижасида икки ой ичида мамлакатда касаллик тарқалишини тўхтатишга эришилди. Мазкур жараёнда хитойлик шифокорлар, мутахассислар катта тажриба орттирди. Уларнинг карантинда сақлаш, касалланганларни самарали даволаш борасидаги ана шу тажрибалари бугун бизга ҳам ёрдам беради.

Хитойлик мутахассислар карантин даврида Андижонда амалга оширилаётган ишлар, карантинга олинганларни сақлаш ҳамда даволаш жараёнлари билан танишди. Вилоятда мазкур йўналишда олиб борилаётган ишларга ижобий баҳо бериб, ишларни янада самарали ташкил этиш юзасидан ўз тажрибалари билан ўртоқлашди, зарур тавсия ва маслаҳатлар берди.

Хитойлик шифокорларнинг вилоятдаги ташрифи давом этмоқда.