Хитойдаги коронавирус бўйича мамлакатимиздаги эпидемик вазият қандай?
Мутахассислар айтишича, жорий йилнинг 23 январь тонгги ҳолатидаги маълумотларга кўра, Хитойда 571 ҳолатда коронавирус касаллиги аниқланган.
Соғлиқни сақлаш вазирлиги ва Санитария-эпидемиологик осойишталик агентлиги Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Хитойнинг Ухан шаҳрида тарқалган коронавирус касаллиги ҳамда мамлакатимизда унга қарши олиб борилаётган чора-тадбирлар юзасидан матбуот анжумани ташкил этди.
Мутахассислар айтишича, жорий йилнинг 23 январь тонгги ҳолатидаги маълумотларга кўра, Хитойда 571 ҳолатда коронавирус касаллиги аниқланган. Ушбу хасталикдан 17 инсон вафот этган. Шунингдек, касаллик Таиланд, Япония ва Жанубий Корея каби давлатларда аниқланган. Ухан шаҳрида ўтказилган эпидемиологик суриштирув натижаларига кўра, айрим касалланган беморлар маҳаллий денгиз маҳсулотлари савдо бозорларида ишлагани маълум бўлган.
Беморларнинг кўпчилиги тана ҳароратининг юқорилиги ҳамда нафас олиши қийинлашишидан шикоят қилган. Кўкрак қафасининг рентгенография хулосасига кўра, айрим ҳолатларда беморларнинг ўпкалари шикастланган. Коронавирус инфекциясининг асосан ҳайвонлардан юқиши тахмин қилинган эди. Бугунги кунда эса ушбу касалликнинг одамдан одамга юқиши маълум бўлган ва 20 га яқин тиббиёт ходими ҳам мазкур хасталикни юқтириб олган.
Таъкидланишича, Хитойда коронавирус бўйича эпидемик вазият мураккаблашиши сабабли "Uzbekistan Airports" АЖ ҳамда "Ўзбекистон темир йўллари" АЖ Тиббий-санитария хизмати томонидан давлат чегарасини, айниқса, Хитойни кесиб ўтган шахсларнинг юқори сифатли тиббий мониторингини амалга ошириш чоралари кўрилмоқда.
Республика Вирусология илмий-текшириш институти интенсив терапия бўлимида коронавирус юқтиргани гумон қилинган беморларни қабул қилиш учун махсус бўлим тайёрлаб қўйилди. Республикадаги аэропорт ва темир йўл вокзаллари санитария карантин пунктларида ушбу касалликка гумон қилинган бемор аниқланса, уни дарҳол изоляция қилиш, коронавирусга лаборатор таҳлилини ўтказиш учун намуна олиш тартиби белгилаб қўйилган.
Соғлиқни сақлаш вазирлиги ҳузуридаги Санитария-эпидемиологик осойишталик агентлиги томонидан коронавирус инфекцияси янги тури юртимиз ҳудудига четдан кириб келиши ва тарқалишининг олдини олиш чора-тадбирлар режаси лойиҳаси ишлаб чиқилди. Коронавируснинг янги турига (nCoV) қарши олиб бориладиган профилактик ва эпидемияга қарши чора-тадбирларни ташкил этиш ҳамда амалга ошириш тўғрисидаги методик услубий кўлланма лойиҳаси тайёрланди.
Анжуманда коронавирус касаллигининг олдини олиш бўйича олиб борилаётган ишлар Соғлиқни сақлаш вазирлиги ҳамда Санитария-эпидемиологик осойишталик агентлиги томонидан қатъий назоратга олингани, Хитойдаги коронавирус бўйича эпидемик вазиятдан юртимиз аҳолиси хавотирланишига ҳеч қандай асос йўқлиги таъкидланди.