Жорий йилнинг 23 июль – 8 август кунлари Япониянинг Токио шаҳрида бўлиб ўтган ёзги олимпия ўйинларида иштирок этишдан бош тортганлиги учун Халқаро олимпия қўмитасининг қарори билан КХДР олимпия қўмитаси ўтказилажак олимпия ўйинларида қатнашишдан мосуво этилди.

ХОҚ ахборотида айтилишича, Шимолий Корея 2022 йилнинг охиригача Халқаро олимпия қўмитаси тизимидаги барча мусобақалардан четлатилган. Бундан англашиладики, 2022 йилнинг 4-20 февраль кунлари Пекинда ўтказиладиган XXIV қишки олимпия ўйинларида КХДР давлат делегацияси қатнашмайди.

Ушбу вазиятга изоҳ берган ХОҚ раҳбари Томас Бах “Бу қарор Шимолий Корея олимпия қўмитаси ва унинг раҳбар органига тегишли. Агарки, шимолий кореялик спортчилар қишки олимпиадада қатнашиш истаги билан мурожаат этса, уларнинг сўрови ХОҚнинг тегишли тузилмалари томонидан кўриб чиқилиши мумкин”лигини таъкидлади.

Тўлқин Рўзиев, ЎзА